rat15p27.jpg -
98767
निरूळ - परिसरामध्ये अचानक आलेल्या पावसामुळे खाचरामध्ये कापून ठेवलेले भातपिक भिजले.

कापलेले भात पावसाने भिजले
पावस परिसरातील स्थिती; ५० टक्के कापणी पूर्ण
सकाळ वृत्तसेवा
पावस, ता. १५ः पावसाने विश्रांती घेतल्यामुळे तयार भातशेती कापण्यास शेतकऱ्यांनी सुरवात केली होती. परतीच्या पावसाच्या शक्यतेमुळे शेतकऱ्यांनी तातडीने भात कापण्याला वेग आला होता. आतापर्यंत पावस परिसरात ५० टक्के भातशेती कापून पूर्ण झालेली आहे. आज अचानक आलेल्या पावसाने कापलेले भात भिजले आहे.
पावस परिसरामध्ये २० मे पासून सुरवात झालेल्या पावसाने ऑक्टोबरमध्ये पूर्णतः विश्रांती घेतली होती. त्यामुळे यावर्षी भातकापणीला अनुकूल वातावरण होते. पावसाच्या विश्रांतीनंतर तयार झालेली भातरोपं कापण्यास सुरवात झाली; परंतु हवामान विभागाकडून येत असलेल्या संदेशामुळे शेतकरी सकाळी कापणी उरकून घेत होता. त्यानंतर सायंकाळी सुकलेले भात उचलून झोडणी आटपत होता. आतापर्यंत ५० टक्के क्षेत्रावरील भातकापणी पूर्ण झाली होती. उर्वरित भातकापणीला वेग आला आहे; परंतु त्यात पावसाचा व्यत्यय आला आहे. पावस परिसरात सायंकाळी विजांच्या गडगडाटासह पावसाने सुरवात केली. सुमारे अर्धा ते पाऊण तास दमदार पाऊस पडला. त्यामुळे आज सकाळी कापलेले भात पावसाने भिजून गेले. भातखाचरामध्ये पाणी साठले असून, पाऊस सुरू राहिल्यास शेतीचे मोठ्या प्रमाणात नुकसान होणार आहे. सायंकाळी पाऊस पडल्यामुळे भिजलेली भातरोपं सुकणे अशक्य आहे. ते भात काळं पडण्याची शक्यता आहे.

कोट
यावर्षी पावसाने दरवर्षीच्या तुलनेत दमदार हजेरी लावली होती. त्यामुळे शेतीला पोषक वातावरण होते; मात्र पाऊस पडल्याने भातशेती धोक्यात आली आहे. गेले आठ दिवस भातकापणीच्या कामांना वेग आला होता. आता तो मंदावण्याची शक्यता आहे.
- नीलेश ठीक, शेतकरी