भाजपतर्फे उपाध्याय प्रशिक्षण महाअभियान
सकाळ वृत्तसेवा
रत्नागिरी, ता. १३ : भाजपतर्फे पंडित दीनदयाळ उपाध्याय प्रशिक्षण महाअभियान राबवण्यात येणार आहे. त्याकरिता रत्नागिरी दक्षिण जिल्ह्यातील १२ मंडलांमध्ये निवासी कार्यशाळा होणार आहेत. यासाठी वक्त्यांची नेमणूक केली असून, याचा उपयोग पक्षबांधणीसाठी होणार आहे, असे भाजपचे जिल्हाध्यक्ष प्रशांत यादव यांनी सांगितले.
पंडित दीनदयाळ उपाध्याय महाअभियानाची रत्नागिरी दक्षिण जिल्हा कार्यशाळा चिपळूणच्या बहादूरशेख नाका येथे झाली. त्यांनी या प्रशिक्षणाबाबत सविस्तर माहिती दिली. अभियानाचे जिल्हा संयोजक मकरंद उर्फ आशिष खातू यांनी प्रशिक्षणासंदर्भात सविस्तर माहिती दिली. कार्यशाळेतील वक्त्यांना देण्यात येणाऱ्या सात प्रमुख विषयांबाबत रत्नागिरी जिल्हा उपाध्यक्ष बळीराम मोरे यांनी सविस्तर माहिती दिली. कार्यशाळेत मार्गदर्शन करण्यासाठी जिल्ह्यातून ३१ अनुभवी वक्त्यांची नेमणूक करण्यात आली आहे. प्रत्येक मंडळामध्ये या कार्यशाळा होणार आहेत. या कार्यशाळेमध्ये एकूण सात सत्र असतील. या कार्यशाळेत इतिहास आणि विकास, वैचारिक अधिष्ठान, कार्यपद्धती, आपल्या सरकारची कामगिरी व अंमलबजावणी, बूथ व्यवस्थापन, सोशल मीडियासारख्या विविध विषयांवर मार्गदर्शन करण्यात येणार आहे. ही कार्यशाळा भारतीय जनता पार्टीच्या कार्यकर्त्यांना पक्षबांधणीसाठी महत्त्वाची ठरणार आहे.