डोर्ले कुटूंबियांकडून
जि. प. शाळेला देणगी
लांजा, ता. १ ः स्वर्गीय तातोबा उर्फ काका महादेव डोर्ले यांच्या स्मृतिप्रीत्यर्थ आणि युगा प्रसाद डोर्ले हिच्या वाढदिवसानिमित्त लांजा शहरातील ‘पीएमश्री जिल्हा परिषद शाळा क्र. ५’ ला भाषण मंच देणगी स्वरूपात प्रदान करण्यात आला. डोर्ले कुटूंबाने सामाजिक बांधिलकी जोपासत समाजासमोर आदर्श ठेवला आहे.
तालुक्यातील शिक्षण क्षेत्रात स्वर्गीय तातोबा उर्फ काका डोर्ले यांचे योगदान अत्यंत मोलाचे राहिले आहे. त्यांनी न्यू एज्युकेशन सोसायटी, लांजाचे अध्यक्ष म्हणून प्रदीर्घ काळ सेवा बजावली होती. त्यांच्या कार्याची आठवण आणि नातीच्या वाढदिवसाचे औचित्य साधून या उपक्रमाचे आयोजन करण्यात आले होते. या निमित्ताने लांजा शहरातील ‘पीएमश्री जिल्हा परिषद शाळा क्र. ५’ ला एक भव्य भाषण मंच देणगी स्वरूपात प्रदान करण्यात आला. ‘सोसायटी मेडिकल’च्या वतीने देण्यात आलेल्या या पोडियमची किंमत सुमारे ३० हजार रुपये आहे. शाळेतील पालक-शिक्षक सभा, शैक्षणिक आणि सांस्कृतिक कार्यक्रमांच्या आयोजनासाठी या मंचाचा मोठा उपयोग होणार आहे.
शाळेत आयोजित विविध गुणदर्शन कार्यक्रमादरम्यान प्रसाद डोर्ले आणि त्यांच्या पत्नीचा विशेष सत्कार करून शाळेच्या वतीने कृतज्ञता व्यक्त करण्यात आली. यावेळी मुख्याध्यापक विश्वनाथ सुर्वे आणि शाळा व्यवस्थापन समितीच्या अध्यक्षा प्रियांजली कुरूप यांनी डोर्ले परिवाराचे आभार मानले.