मुंबई : भारतीय संघाचा अनुभवी खेळाडू अजिंक्य रहाणे (Ajinkya Rahane) सध्या संघर्षाचा सामना करत आहे. कामगिरीतील सातत्य कायम ठेवण्यात अपयशी ठरल्याने त्याला संघाबाहेरचा रस्ता दाखवण्यात आलाये. एवढेच नाही तर बीसीसीआयने (BCCI ) त्याला अ श्रेणीतून ब श्रेणीत टाकले आहे. रणजी सामन्यात स्वत:ला सिद्ध करण्याची धडपड करत असलेल्या रहाणेला आपल्या कठिण प्रसंगात ज्ञानाचे मंदीर आठवल्याचे दिसते. रहाणेनं नुकतीच आपल्या शाळेला भेट दिली. त्याच्यासोबत मुलगी आणि पत्नी देखील होती. या भेटीची गोष्ट त्याने खास व्हिडिओच्या माध्यमातून शेअर केलीये.

अजिंक्य रहाणेनं डोंबिवलीतील आपल्या शाळेला भेट देत जुन्या आठवणीला उजाळा दिलाय. 33 वर्षीय अजिंक्य रहाणेनं डोंबिवलीतील 'एस व्ही जोशी माध्यमिक विद्यालयाला भेट दिली. याच ठिकाणी त्याने शिक्षण घेतले होते. काळानुसार ही जागा बदलली असली तरी या जागेबद्दलच्या भावना त्याच आहेत. इथं आल्यानंतर जमीनीशी जोडले आहोत, ही गोष्ट जाणवते, अशा अशी भावना अजिंक्य रहाणेनं व्यक्त केली आहे. त्याने शाळेबद्दलची आपुलकीच दाखवून दिलीये.

मागील वर्षी भारतीय संघाने ऑस्ट्रेलियाच्या मैदानात ऐतिहासिक कामगिरी करुन दाखवली होती. यावेळी विराट कोहलीच्या अनुपस्थितीत अजिंक्य रहाणेनंच भारतीय कसोटी संघाचे नेतृत्व केले होते. पण काही दिवसांपासून त्याच्या भात्यातून धावा होताना दिसत नाही. खराब कामगिरीमुळे त्याने टीम इंडियातील जागा गमावली आहे. रणजी ट्रॉफी स्पर्धेत त्याने सौराष्ट्र विरुद्ध शतकी कामगिरी केली होती. आता इंडियन प्रीमियर लीगमध्ये तो कोलकाता नाईट रायडर्सच्या संघातून खेळताना दिसणार आहे.

काही दिवसांपूर्वीच बीसीसीआयने 2021-22 या वर्षासाठी करार यादी जाहीर केली होती. गेल्या काही दिवसांपासून खराब कामगिरी करणाऱ्या अजिंक्य रहाणे आणि चेतेश्वर पुजाराला अ श्रेणीतून ब श्रेणीत टाकण्यात आले. एवढेच नाही तर लंकेविरुद्धच्या कसोटी मालिकेतूनही दोघांना वगळण्यात आले आहे.