नवी दिल्ली : जॉस बटलरने (Jos Buttler) यंदाच्या आयपीएल हंगामात धडाकेबाज फलंदाजीचे प्रदर्शन केले. त्याने चार शतके ठोकत हंगामातील 17 सामन्यात 863 धावा केल्या. त्याच्या या तुफानी बॅटिंगमुळे तो आता विराट कोहलीचा (Virat Kohli) 2016 चा 973 धावांचा विक्रम मोडतो की काय असे वाटू लागले होते. त्याने हंगामात सर्वाधिक शतकांचा विराटच्या विक्रमाशी बरोबरी केली. मात्र विराटचा धावांचा विक्रम मात्र कायम राहिला. दरम्यान, विराट कोहलीच्या 2016 च्या ड्रीम आयपीएल हंगामात आणि जॉस बटलरच्या 2022 च्या हंगामात काही कॉमन फॅक्टर (Common Factor) आहेत.

आयपीएलच्या 2016 च्या हंगामात रन मशीन विराट कोहलीने इतिहास रचला होता. त्याने रॉयल चॅलेंजर बेंगलोरसाठी 973 धावा ठोकल्या. त्याने एकट्याच्या जीवावर आरसीबीला फायनलमध्ये पोहचवले होते. 2022 मध्ये देखील जॉस बटलरने एकट्या जीवावर राजस्थानला फायनलमध्ये पोहचवले. विराट कोहलीने 2016 च्या हंगामात चार शतके ठोकली. जॉस बटलरने 2022 च्या हंगामात त्याची बरोबरी केली.

2016 च्या हंगामात विराट कोहली ऑरेंज कॅपचा मानकरी होता. मात्र त्याला सनराईजर्स हैदराबादविरूद्धच्या अंतिम सामन्यात पराभव पत्करावा लागला. 6 वर्षानंतर 2022 मध्ये हाच कित्ता गिरवला गेला. बटलरने संघाला फायनलपर्यंत पोहचवले. मात्र शेवटचा सामना जिंकता आला नाही. जॉस बटलरला ऑरेंज कॅप जिंकून देखील कप जिंकता आला नाही.

विराट आणि बटलर यांच्यातील कॉमन फॅक्टर इथंच संपत नाहीत. 2016 ला आरसीबी गुणतालिकेत दुसऱ्या स्थानावर होती. तर 2022 मध्ये राजस्थान रॉयल्स देखील गुणतालिकेत दुसऱ्या स्थानावर होती. दोन्ही हंगामात गुजरातच्या संघांनी गुणतालिकेत टॉप केले होते. याचबरोबर 2016 आणि 2022 या हंगामाची फायनल 29 मे ला खेळली गेली. यात कोहलीची रॉयल आणि बटलरची रॉयल्स उपविजेती ठरली. सध्या हे 2016 च्या विराट कोहली आणि 2022 च्या जॉस बटलर यांच्यातील कॉमन फॅक्टर नेटकऱ्यांनी सोशल मीडियावर शेअर केले.