Jasprit Bumrah Ben Stokes : भारताचा उपकर्णधार जसप्रीत बुमराहने दुसऱ्या कसोटीत इंग्लंडविरूद्ध तिखट मारा केला. त्याने इंग्लंडच्या रथी महारथींची विकेट घेतली. त्याने ओली पोपचा उडवलेला त्रिफळा हा चर्चेचा विषय ठरला. मात्र चहापानानंतर कर्णधार बेन स्टोक्सने टेन्शन वाढवले होते. त्यात रोहितनं त्याला जीवनदान दिलं होतं.

मात्र उपकर्णधाराने कर्णधाराची लाज वाचवली. त्याने स्टोक्सचा 47 धावांवर त्रिफळा उडवला. जसप्रीत बुमराहने दुसऱ्या कसोटीत पहिल्या डावात टॉम हार्टलीला 21 धावांवर बाद करत आपला पंजा पूर्ण केला. याचबरोबर त्याने आपल्या 150 विकेट्स देखील पूर्ण केल्या.

भारताने इंग्लंडचे 7 फलंदाज माघारी धाडले होते. मात्र इंग्लंडचा कर्णधार बेन स्टोक्स क्रिजवर ठाण मांडून बसला होता. पहिल्या कसोटी सामन्याप्रमाणे स्टोक्स तळातील फलंदाजांना साथीला घेत भारताची डोकेदुखी वाढवत होता.

दरम्यान, रोहित शर्माने 45 व्या षटकात बेन स्टोक्सला जीवनदान दिलं. त्याने कुलदीप यादवच्या गोलंदाजीवर झेल सोडला. याचा फायदा उचलत स्टोक्सने हार्टली सोबत जवळपास अर्धशतकी भागीदारी रचण्याचा प्रयत्न केला. मात्र बुमराहने रोहितची लाज वाचवत स्टोक्सचा 47 धावांवर त्रिफळा उडवला.

स्टोक्स बाद झाल्यानंतर बुमराहनेच इंग्लंडचा डाव संपवला. त्याने आपल्या कसोटीतील 150 विकेट्स पूर्ण केल्या. त्याने हार्टलीला 21 तर जेम्स अँडरसनला 6 धावांवर बाद केले. इंग्लंडचा पहिला डाव 253 धावांवर संपला. भारताकडे आता पहिल्या डावात 143 धावांची आघाडी आहे. भारत आज दिवसाची उरलेली 11 षटके खेळण्यासाठी मैदानात उतरले.

(Sports Latest News)