ब्यूनस एअर्स (अर्जेंटिना) : दिग्गज फुटबॉलपटू लिओनेल मेस्सी पुन्हा एकदा अर्जेंटिनाच्या सेवेसाठी दाखल झाला आहे. २०२६ मध्ये होत असलेल्या फुटबॉल विश्‍वकरंडकाच्या पात्रता फेरीला उद्यापासून सुरुवात होत आहे. अर्जेंटिनाचा फुटबॉल संघ घरच्या मैदानावर होणार असलेल्या लढतीत इक्वेडोरशी दोन हात करणार आहे.

मागील वर्षी (२०२२) विश्‍वकरंडकाच्या अंतिम फेरीत फ्रान्सला हरवून अर्जेंटिनाने १९८६ नंतर विजेतेपदावर मोहोर उमटवली. मेस्सीच्या नेतृत्वात अर्जेंटिनाला हा करिष्मा करता आला. त्यानंतर अर्जेंटिनाचा संघ या वर्षी चार मैत्रीपूर्ण सामने खेळला. अर्जेंटिनाच्या संघाने मैत्रीपूर्ण सामन्यांमध्ये पनामा, कुराकाओ, ऑस्ट्रेलिया व इंडोनेशिया या चारही देशांना पराभूत केले. अर्जेंटिनाचा संघ पहिल्यांदाच आंतरराष्ट्रीय व्यावसायिक लढत उद्या खेळणार आहे.

मेस्सी याने इंटर मियामी या क्लबशी जोडल्यानंतर त्यांच्यासाठी मोलाची कामगिरी बजावली. मेस्सीच्या जबरदस्त कामगिरीच्या जोरावर इंटर मियामी क्लबने लीग करंडकाच्या अजिंक्यपदावर अगदी रुबाबात मोहोर उमटवली. आता क्लब फुटबॉलमध्ये देदीप्यमान यश मिळवल्यानंतर मेस्सी पुन्हा एकदा देशासाठी खेळताना दिसणार आहे.

निवृत्तीच्या निर्णयाबद्दल अनिश्‍चिता

लिओनेल मेस्सीच्या नेतृत्वात अर्जेंटिनाने विश्‍वकरंडक पटकावल्यानंतर तो निवृत्त होईल अशी चर्चा रंगू लागली होती; मात्र मेस्सीने याला नकार दिला. जुलै महिन्यात घेण्यात आलेल्या मुलाखतीत तो म्हणाला, फुटबॉलविश्‍वात सर्व काही मिळवले आहे.

आता त्याचा आनंद घ्यावयाचा आहे. वय वाढत चालले आहे. त्यामुळे साहजिकच लवकरच निवृत्तीचा निर्णय घेतला जाईल असे म्हटले जाते; मात्र सध्या तरी निवृत्तीचा निर्णय केव्हा घेईन, हे मला सांगता येणार नाही. दरम्यान, मेस्सीच्या वक्तव्यामुळे निवृत्तीबद्दल सध्या तरी अनिश्‍चितता आहे.

त्याच्यासाठी दरवाजे उघडे ः स्कॅलोनी

अर्जेंटिना फुटबॉल संघाचे मुख्य प्रशिक्षक लिओनेल स्कॅलोनी यांनी म्हटले, की लिओनेल मेस्सी हा अर्जेंटिनाचा प्रमुख खेळाडू आहे. तो २०२६ मधील विश्‍वकरंडकही खेळू शकतो. त्याच्यासाठी नेहमीच दरवाजे उघडे असतील. आता त्याच्या मनावर आहे. त्याला वाटले की मला पुन्हा मैदानात उतरावयाचे आहे, तर तो संघात कायम राहू शकतो, असे त्यांनी पुढे नमूद केले होते.