Ranji Trophy Final : बंगालचा क्रिकेट संघ म्हटलं की प्रिन्स ऑफ कोलकाता सौरव गांगुलीचाच चेहरा डोळ्यासमोर येतो. सौरव गांगुलीने आपल्या डावखुऱ्या शैलीदार फलंदाजीने, उत्तम नेतृत्व कौशल्याने आणि नंतर बीसीसीआयचा अध्यक्ष होऊन दिग्गजत्व मिळवले. मात्र बंगालचा कर्णधार म्हणून त्याला आपल्या राज्याच्या संघाला रणजी ट्रॉफी काही जिंकून देता आली नाही. गेल्या काही वर्षात बंगालने रणजी ट्रॉफीमध्ये चांगली कामगिरी केली आहे. त्यांनी 2019 - 20 पासून सलग तीन हंगामात सेमी फायनल गाठली आहे.

आता ही संधी बंगालचा क्रीडामंत्री असलेल्या मनोज तिवारीला मिळाली आहे. आजपासून इडन गार्डनच्या घरच्या मैदानावर बंगाल जयदेव उनाडकटच्या नेतृत्वात खेळणाऱ्या तगड्या सौराष्ट्र सोबत ट्रॉफीवर कब्जा मिळवण्यासाठी भिडणार आहेत.

बंगाल आणि सौराष्ट्र हे 2019 - 2020 च्या हंगामात देखील ट्रॉफीसाठी भिडले होते. त्यावेळी घरच्या मैदानावर खेळणाऱ्या सौराष्ट्रने बंगालला मात देत विजेतेपद पटकावले होते. त्यावेळी सौराष्ट्रचा कर्णधार जयदेव उनाडकटच होता.

बंगालने आपली शेवटची रणजी ट्रॉफी संबरन बॅनर्जी यांच्या नेतृत्वाखाली 1989 - 90 ला जिंकली होती. पावसाचा फटका बसलेल्या या सामन्यात बंगालने सरस धावगतीच्या जोरावर सामना जिंकला होता. हा सामना देखील इडन गार्डनवरच झाला होता.

या सामन्यात सौरव गांगुली देखील खेळला होता. मात्र तो त्यावेळी संघाचा कर्णधार नव्हता. त्याने चौथ्या क्रमांकावर फलंदाजी करत 22 धावा केल्या होत्या.

आता जवळपास तीन दशकांनंतर बंगाल पुन्हा एकदा आपल्या घरच्या मैदानावर रणजी ट्रॉफी फायनल खेळत आहे. त्यामुळे त्यांना विजेतेपदाचा 33 वर्षाचा दुष्काळ संपवण्याची चांगली संधी आहे.

(Sports Latest News)