मुंबई : महाराष्ट्राचे ज्येष्ठ राष्ट्रीय कबड्डी खेळाडू वसंत ढवण (वय ८८) यांचे वृद्धापकाळाने निधन झाले. त्यांच्या पश्चात पत्नी सावित्रीबाई, तीन मुलगे, मुलगी, सुना व नातवंडे असा परिवार आहे.

ढवण हे मूळचे कणकवलीचे. ते वयाच्या १४व्या वर्षी मुंबईला आले. लोअर परळ येथील श्रीराम कबड्डी संघाकडून त्यांनी कबड्डी खेळायला सुरुवात केली. अमृतसर येथे १९६१साली झालेल्या राष्ट्रीय कबड्डी स्पर्धेत ते प्रथम महाराष्ट्राकडून खेळले.

त्यानंतर जबलपूर (१९६२), अलाहाबाद (१९६३), कोल्हापूर- महाराष्ट्र (१९६४), हैद्राबाद (१९६५), बडोदे (१९६६) अशा सलग सहा स्पर्धेत ते महाराष्ट्राकडून खेळले; पण त्यांना महाराष्ट्राचे नेतृत्व करण्याची संधी १९७० मध्ये मिळाली.