मुंबई/नवी दिल्ली - सुशील कुमारने अखेर टीकाकारांना गप्प करतानाच भारतीय कुस्ती महासंघाचीही काहीशी लाज राखली. भारतीय कुस्ती महासंघाने सुशील कुमारची प्रवेशिका चाचणीपूर्वीच पाठविली होती आणि त्याने निवड चाचणी सहज जिंकत महासंघाचीही शान राखली. 

सुशील कुमार तब्बल आठ वर्षांनी जागतिक स्पर्धेत खेळणार आहे. सुशीलने जितेंदर कुमारला निर्णायक चाचणी लढतीत ४-२ असे पराजित करून कझाकस्तान स्पर्धेतील ७४ किलो वजनी गटातील प्रवेशिका निश्‍चित केली. जितेंदरला ७९ किलो गटाची चाचणी खेळण्याची संधी आहे. 

राहुल आवारे जागतिक संघात
महाराष्ट्राच्या राहुल आवारे याने ६१ किलो गटाची पात्रता मिळवली. त्याने रवींदरचा ६-१ असा पराभव करीत ही कामगिरी साध्य केली. त्याने यापूर्वी नवीन कुमारला ९-४ असे हरविले होते. राहुलचा गट हा ऑलिंपिकमध्ये नाही. त्याने गतवर्षी राष्ट्रकुल स्पर्धेत ५७ किलो गटात सुवर्णपदक जिंकले होते. मात्र, त्याने आपला गट बदलला आहे. ‘‘जागतिक गटासाठी पात्र ठरलो असलो, तरी ऑलिंपिक गटात खेळणार नाही, याची थोडीशी खंत आहे. ऑलिंपिक चाचणी गटाच्या वेळी दुखावलेला खांदा अजून पूर्ण बरा झालेला नाही. पण, तरीही चांगली कुस्ती झाल्याचे समाधान आहे,’ असे राहुलने सांगितले.