Summer Care Tips: उन्हाचा चटका दिवसेंदिवस वाढत आहे. पण, काम काही थांबविता येत नाही. अशावेळी योग्य आहारातून थकवा दूर सारता येतो, असे तज्ज्ञांनी सांगितले. उन्हाळ्यात लवकर थकवा येणे, सुस्त वाटणे, खूप घाम येणे, पायांना गोळे येणे, अशक्तपणा जाणवणे, तोंड कोरडे पडणे, भूक न लागणे अशा कुरबुरी सुरूच असतात.

उन्हाळ्यात खूप थकवा आल्यासारखे वाटण्याचे कारण म्हणजे, शरीरातून जो घाम बाहेर पडतो, त्याद्वारे शरीरातील महत्त्वाची खनिजे बाहेर पडतात. याबाबत आहारतज्ज्ञ डॉ. अलका कर्णिक म्हणाल्या, ‘‘घामावाटे शहरातील लोह जास्तीत-जास्त प्रमाणात बाहेर पडते. त्यामुळे लोहयुक्त घटकांचा आहारात जास्तीत-जास्त वापर करावा.

पोटॅशियम हे खनिज शरीरातील आम्ल आणि अल्कलीचे संतुलन व्यवस्थित राखण्याचे काम करते. त्यामुळे शरीरातील ॲसिडिटी कमी करून शरीर अल्कलाइन होते. पोटॅशियम योग्य प्रमाणात असेल, तर लगेच थकवा कमी होतो.

उन्हाळ्यात मूत्र प्रमाण वाढविण्यासाठी, शरीराचा दाह कमी करण्यासाठी नारळपाण्यासोबत पालक रस घेतल्यास लघवी साफ होते. नारळपाण्यासोबत धने आणि बडीशेप पावडरचे पाणी एकत्रित केल्यासही लघवी साफ होते.

शारीरिक उत्साह वाढविण्यासाठी फॉस्फरस शरीराला अतिशय आवश्यक आहे. फॉस्फरसची योग्य मात्रा शरीरास प्राप्त झाल्यास अशक्तपणा लवकर जातो. कॅल्शियमच्या अभावानेही थकवा लवकर येतो, निस्तेज वाटतं, पायांना गोळे येतात. जेवणात काकडीचाही वापर हवा. काकडी उष्णता बाहेर टाकते. शरीरातील द्रव पदार्थांच्या क्षारांचे नियंत्रण ठेवण्यासाठी संतुलन राखण्यासाठी मॅग्नेशियमची भूमिका महत्त्वाची आहे.’’