जळगाव : एकनाथ खडसे ज्येष्ठ व प्रभावी नेते आहेत. मात्र, त्यांच्या काही व्यक्तिगत अडचणी, समस्या असतील.. त्यामुळे त्यांनी आमचा पक्ष सोडून भाजपत जाण्याचा निर्णय घेतला असण्याची दाट शक्यता आहे, याचा पुनरुच्चार करत शरद पवारांनी त्यांची पाठराखण केली. खडसेंच्या राजीनाम्याबाबत आपल्याला काही माहिती नाही, जयंत पाटलांकडे त्यासंबंधी माहिती असू शकते, असेही पवार म्हणाले.

रावेर लोकसभा मतदारसंघात उमेदवाराच्या प्रचारार्थ ते जळगाव जिल्ह्यात आले असता, त्यांनी पत्रकार परिषदेत यासंबंधी भूमिका मांडली. जळगाव जिल्हा भाजपचा बालेकिल्ला असल्याबाबत विचारले असता ते म्हणाले, सुरवातीपासून हा जिल्हा काँग्रेस विचारांना मानणारा आहे. मध्यंतरीच्या काळात हे चित्र बदलले असेल. परंतु, तरीही काँग्रेस, राष्ट्रवादी व उद्धव ठाकरेंची शिवसेना अशा तीनही पक्षांचे कार्यकर्ते सध्या जिल्ह्यात खूप मेहनत घेत आहेत. त्यामुळे या वेळी निकाल वेगळे असतील, असे पवार म्हणाले.

भाजप उमेदवार पाच लाखांच्या मताधिक्याने विजयी होतील, या गिरीश महाजनांच्या वक्तव्याचा समाचार घेताना या मतदारसंघात १८ लाख मतदार आहेत. त्यामुळे महाजनांनी त्यांचे मताधिक्य कमी सांगितले, उलट त्यांचे उमेदवार १८ लाखांच्या फरकाने निवडून येतील, अशी उपरोधिक टीका पवारांनी केली. संतोष चौधरींचे भाषण तुम्ही ऐकले, त्यात कुठेही नाराजी दिसली का? असा प्रतिप्रश्‍न करत पवारांनी चौधरींच्या बंडाच्या विषयास पूर्णविराम दिला. या वेळी त्यांच्यासमवेत पक्षाच्या महिला आघाडीच्या प्रदेशाध्यक्षा रोहिणी खडसे उपस्थित होत्या.

मोदींचे भाषण पक्षापुरते मर्यादित-

सभेच्या भाषणात मोदींवर टीका करण्यासंबंधी पवारांना विचारले असता, ते म्हणाले, आपण अनेक वर्षांपासून निवडणुका पाहत आलो आहोत. निवडणुकीदरम्यान पंतप्रधान प्रचाराला आले की, देशाविषयी, देशाच्या विकासासंबंधी बोलायचे. नरेंद्र मोदी त्यास अपवाद आहेत. मोदी फक्त त्यांच्या पक्षापुरते बोलत असतात. त्यात कुठेही देशाच्या विकासाचे, देशहिताचे विषय नसतात. पंतप्रधान म्हणून भाषण अपेक्षित असताना त्यांचे भाषण एखाद्या पक्षाच्या नेत्यासारखे मर्यादित असते, असे पवार म्हणाले.