कोलकता : आंध्र प्रदेशचे मुख्यमंत्री एन. चंद्राबाबू नायडू आणि पश्‍चिम बंगालच्या मुख्यमंत्री ममता बॅनर्जी यांच्यात गुरुवारी (ता. 9) बंद दाराआड चर्चा झाली. खड्‌गपूर येथे या दोन नेत्यांमध्ये झालेल्या चर्चेत महाआघाडीच्या (महागठबंधन) भविष्यातील नियोजनाबाबत चर्चा झाल्याची माहिती सूत्रांनी दिली. 

गुरुवारी संध्याकाळी नायडू आणि बॅनर्जी यांच्यात बंद दाराआड सुमारे पंधरा मिनिटे चर्चा झाल्याची माहिती तृणमूल कॉंग्रेसच्या वरिष्ठ नेत्याने "पीटीआय'शी बोलताना दिली. या वेळी दोन्ही नेत्यांमध्ये "महाआघाडी'संदर्भात चर्चा झाल्याचे समजते. कॉंग्रेसचे अध्यक्ष राहुल गांधी आणि नायडू यांच्यात दिल्लीत झालेल्या बैठकीबाबतही या वेळी चर्चा झाल्याचे सांगण्यात आले.

दिल्लीत 21 मे रोजी विरोधी पक्षांच्या नेत्यांची दिल्लीत बैठक होण्याची शक्‍यता असून, या बैठकीला बॅनर्जी या उपस्थित राहणार का, या प्रश्नावर "तृणमूल'च्या नेत्याने स्पष्ट केले, की दिल्लीतील बैठकीची तारीख अद्याप निश्‍चित झालेली नाही. कदाचित बैठकीची तारीख बदलू शकते. 23 मेनंतर बॅनर्जी या बैठकीत सहभागी होऊ शकतात. 

"व्हीव्हीपॅट'च्या मुद्यावरही नायडू आणि बॅनर्जी यांच्यात चर्चा झाल्याचे समजते; तसेच लोकसभा निवडणुकीच्या पाच टप्प्यांतील मतदानाच्या आकडेवारीवरही या वेळी चर्चा झाल्याचे "तृणमूल'च्या नेत्याने सांगितले.