मुंबई : काँग्रेसचे ज्येष्ठ नेते आणि विधानसभेतील विरोधी पक्षनेते राधाकृष्ण विखे-पाटील अद्याप काँग्रेसमध्ये आहेत, याचा आनंद आहे, अशी प्रतिक्रिया राष्ट्रवादी काँग्रेसचे अध्यक्ष शरद पवार यांनी आज (गुरुवार) दिली. तसेच विखे-पाटील यांच्या अन्य वक्तव्यांवर मी काय बोलणार, असेही ते म्हणाले.

राधाकृष्ण विखे-पाटील यांचे चिरंजीव डॉ. सुजय विखे-पाटील यांनी काँग्रेसला रामराम करत भाजपमध्ये प्रवेश केला. सुजय यांच्या भाजपप्रवेशानंतर त्यांचे वडील राधाकृष्ण विखे-पाटील यांच्यावर काँग्रेसच्या काही नेत्यांकडून टीका केली जात होती. त्यानंतर नैतिकेतेनुसार राधाकृष्ण विखे-पाटील विधानसभेतील विरोधी पक्षनेतेपदाचा राजीनामा देतील, अशी शक्यता व्यक्त केली जात होती.

तसेच राधाकृष्ण विखे-पाटील काँग्रेसमधून बाहेर पडून भाजपमध्ये प्रवेश करतील, असाही अंदाज वर्तवला जात होता. आज विखे-पाटील यांनी पत्रकार परिषद घेतली. यामध्ये त्यांनी कोणतीही महत्त्वाची घोषणा केली नाही. त्यामुळे शरद पवार यांनी विखे-पाटील अद्याप काँग्रेसमध्ये असल्याचा आपणांस आनंद आहे, असे सांगितले.