पाटणा : जवाहरलाल नेहरू विद्यापीठ (जेएनयू) संघटनेचा माजी विद्यार्थी नेता कन्हैया कुमार आता निवडणुकीच्या मैदानात उतरला आहे. कन्हैया कुमार बिहारच्या बेगुसरायमधून लोकसभा निवडणूक लढविणार असून, भारतीय कम्युनिस्ट पक्षाकडून (भाकप) उमेदवारी देण्यात आली आहे. 

बिहारमध्ये महाआघाडी करण्यासाठी मागील काही दिवसांपासून वेगवान हालचाली सुरू होत्या. त्यातच कन्हैया कुमारला महाआघाडीकडून उमेदवारी देण्यात आली नाही. मात्र, भाकपने त्याला उमेदवारी दिली आहे. याबाबतची घोषणा बिहारचे सचिव सत्यनारायण सिंह यांनी केली. कन्हैया कुमार बेगुसरायमधून लोकसभा निवडणूक लढवणार असल्याने या मतदारसंघात आता तिरंगी लढत होण्याची शक्यता व्यक्त केली जात आहे. 

दरम्यान, सतत वादग्रस्त वक्तव्य करून नेहमी चर्चेत असणारे भाजप नेते आणि केंद्रीयमंत्री गिरिराज सिंह आणि राष्ट्रीय जनता दलाचे तन्वीर हसन यांच्याशी कन्हैया कुमारला सामाना करावा लागणार आहे. 

डाव्या पक्षांचाही मिळणार पाठिंबा

कन्हैया कुमारने जवाहरलाल नेहरु विद्यापीठातील विविध निवडणुकांमध्ये यशस्वी राजकारण केले होते. त्यामुळे त्याची तरुणांमध्ये स्वतंत्र ओळख निर्माण झाली आहे. त्यामुळे आता त्याला इतर डाव्या पक्षांचाही पाठिंबा मिळण्याची शक्यता वर्तवली जात आहे.