डुंगरपूर (राजस्थान) : गेल्या पाच वर्षांत नरेंद्र मोदी सरकारने भारतातील जनतेवर अन्यायच केला आहे. मात्र कॉंग्रेसचे सरकार आल्यानंतर देशात पुन्हा न्यायाचे राज्य येईल, असा विश्‍वास कॉंग्रेस अध्यक्ष राहुल गांधी यांनी व्यक्त केला. 

आदिवासी बहुल डुंगरपूर मतदारसंघातील कॉंग्रेस उमेदवाराच्या प्रचारार्थ बेनेश्‍वर धाम येथे आज आयोजित सभेत राहुल बोलत होते. ते म्हणाले, जनतेच्या आशा-आकांक्षा पूर्ण करण्यात मोदी सरकार अपयशी ठरले. त्यांनी केवळ पंधरा ते वीस जणांसाठी सरकार चालवले. मोदी यांनी दरवर्षी 2 कोटी रोजगाराचे आश्‍वासन दिले होते, पंधरा लाख खात्यात जमा होणार असल्याचे सांगितले होते, तसेच पिकांना चांगला हमीभाव मिळेल, असेही आश्‍वासन दिले होते.

मात्र मोदी सरकार शेतकऱ्यांच्या अपेक्षा पूर्ण करू शकले नाही. देशातील वंचित घटक, गरीब, आदिवासी, मागासर्वीय, गरिबांवर मोदी सरकारने अन्यायच केला आहे. तो अन्याय दूर करणार असल्याचे राहुल यांनी सांगितले. तत्पूर्वी राहुल गांधी यांनी बेनेश्‍वर धाम येथील शिवमंदिरात जावून दर्शन घेतले.