मुंबई : राज्यात दिवसभरात १०,६९७ कोरोनाबाधित रुग्णांची वाढ झाली. त्याचबरोबर १४,९१० रुग्ण बरे झाल्याने त्यांना डिस्चार्ज देण्यात आला. दरम्यान, राज्यातील रुग्ण बरे होण्याचं प्रमाण ९५.४८ टक्क्यांवर पोहोचलं आहे. राज्याच्या आरोग्य विभागानं ही माहिती दिली. (10697 new corona patients registered in the state during the day)

आरोग्य विभागाच्या माहितीनुसार, राज्यात आज १०,६९७ कोरोनाबाधित रुग्णांची वाढ झाली तर नवीन १४,९१० कोरोनाबाधित रुग्ण बरे झाले आहेत. यामुळे आजवर एकूण ५६,३१,६७६ रुग्ण बरे होऊन दवाखान्यातून घरी पाठविण्यात आले आहेत. राज्यात सध्या एकूण १,५५,४७४ अॅक्टिव्ह रुग्ण आहेत. राज्यातील रुग्ण बरे होण्याचं प्रमाण आता ९५.४८ टक्के झालं आहे.

दरम्यान, आज दिवसभरात राज्यात ३६० रुग्णांचा मृत्यू झाला तर त्यामुळे कोरोनाबाधितांचा मृत्यूदर १.८४ टक्के झाला आहे. त्याचबरोबर आजवर राज्यात ३,७८,३४,०५४ पैकी ५८,९८,५५० नमुने पॉझिटिव्ह आले आहेत. म्हणजेच आत्तापर्यंत राज्यात १५.५९ टक्के रुग्ण पॉझिटिव्ह आढळले आहेत. राज्यात सध्या ९,६३,२२७ कोरोनाबाधित होम क्वारंटाईन आहेत. तर ५,८०७ रुग्ण संस्थात्मक क्वारंटाइन आहेत.

त्याचबरोबर पुण्यात शनिवारी ३३१ बाधित रुग्ण आढळून आले. तर ४५९ रुग्ण बरे झाल्यानं त्यांना डिस्चार्ज देण्यात आला. त्याचबरोबर १० कोरोनाबाधित रुग्णांचा आज मृत्यू झाला. तर मुंबईत चोवीस तासात ७३३ बाधित रुग्ण आढळून आले आहेत. ७३२ रुग्णांना डिस्चार्ज देण्यात आला. मुंबईत सध्या १५,७९८ सक्रीय रुग्ण आहेत.