ठाकरे गटाचा उद्या मुंबईत शिंदे-फडणवीस सरकारविरोधात मोठा मोर्चा आहे. या पार्श्वभूमीवर शिंदे गट देखील आदित्य ठाकरे यांना मोठा धक्का देणार आहे. आदित्य ठाकरे यांच्या अत्यंत जवळचा असलेला एक नेता शिंदे गटामध्ये प्रवेश करत आहे. येत्या १ जुलै रोजी त्यांचा प्रवेश होत आहे. मागच्या वर्षी त्यांच्या घरावर सीबीआयचा छापा पडला होता, तेव्हापासून ते सक्रीय नव्हते.

आदित्य ठाकरे यांचे अत्यंत जवळचे मानले जाणारे राहुल कनल हे येत्या एक जुलै रोजी शिवसेना शिंदे गटात प्रवेश करणार आहे. गेल्या वर्षी राहुल कनल यांच्या घरावर सीबीआयचा छापा पडला होता. तेव्हापासून राहुल कनाल हे शिवसेनेत फारसे सक्रिय नव्हते. यामुळे ठाकरे गटाने सावध पाऊल उचलले आहे.

राहुल कनाल यांच्या विभागातील युवासेना पदाधिकाऱ्यांच्या पदांना स्थगिती देण्यात आली आहे. वांद्रे पश्चिममधील युवासेनेच्या सर्व पदाधिकाऱ्यांच्या पदांना स्थगिती देण्यात आली आहे. शिवसेना मध्यवर्ती कार्यालयातून हे आदेश काढण्यात आले. राहुल कनाल हे उद्याच शिंदे गटात प्रवेश करणार असल्याची शक्यता आहे.

मागील एक वर्षाच्या काळात राहुल कनल शिवसेना भवन किंवा 'मातोश्री'वर देखील ते फिरकले नाहीत. काही दिवसांपूर्वीच त्यांनी युवा सेनेच्या कोअर कमिटीच्या व्हाट्सअप ग्रुप मधून देखील एक्झिट केला होता. तेव्हापासूनच ते ठाकरेंची साथ सोडून इतर कोणत्यातरी पक्षात जाणार अशी चर्चा रंगली होती.

मात्र आता त्यांनी शिवसेना शिंदे गटात जाण्याचा निर्णय घेतला असून येत्या एक जुलै रोजी ते आपल्या समर्थकांसह शिवसेना शिंदे गटात प्रवेश करणार असल्याची माहिती सूत्रांनी दिली आहे.'साम टीव्ही'ने यासंदर्भातील वृत्त दिले आहे.