सोलापूर : दहावी पास विद्यार्थ्यांपासून पदवी, पदव्युत्तर पदवी उत्तीर्ण झालेल्या विद्यार्थ्यांना त्यांच्याच जिल्ह्यात, शहरात नोकरी तथा रोजगाराची संधी मिळावी, यासाठी आता शासनाच्या जिल्हा कौशल्य विकास, रोजगार व उद्योजकता मार्गदर्शन केंद्रातर्फे पंडित दीनदयाल उपाध्याय रोजगार मेळावे घेतले जात आहेत. प्रत्येक तीन महिन्यातून एकदा हा रोजगार मेळावा जिल्ह्याच्या ठिकाणी होतो आणि वर्षातील चार मेळाव्यातून किमान १० हजार तरुणांना रोजगार, नोकरीची संधी मिळते.
शिकून पुढे काय करायचे, नोकरी काय सगळ्यांनाच मिळते का, शिकून काही उपयोग नाही अशा चर्चा गावागावात, शहरातील काही भागात ऐकायला मिळतात. पण, सरकारी नोकरीपेक्षाही त्या विद्यार्थ्याला त्याचे शिक्षण व कौशल्यानुसार त्याच्याच जिल्ह्यात रोजगार-नोकरीची संधी उपलब्ध होत आहेत. खासगी उद्योजकांना त्यांच्या मागणीनुसार मनुष्यबळ पुरविले जाते आणि विशेष बाब म्हणजे त्या तरुण-तरुणींना त्यांच्या अपेक्षेप्रमाणे पगार मिळतो. सुरवातीला फार वेतन तथा मानधन नसते, पण अनुभवानंतर त्यांचे कौशल्य पाहून त्यांना पगारवाढ दिली जाते, असे अधिकारी सांगतात.
एखाद्या रोजगार मेळाव्यात विद्यार्थ्याची नोकरीची संधी हुकली, तर त्याला दुसऱ्या मेळाव्यात सहभाग घेता यावा म्हणून तीन महिन्यातून एकदा असे मेळावे घेतले जात आहेत. पण, विद्यार्थ्यांनी पुस्तकी शिक्षणाबरोबरच कौशल्यपूर्ण विविध कोर्सेस, अभ्यासक्रम शिकायला हवा आणि त्यातही प्रात्यक्षिक ज्ञान त्या विद्यार्थ्यास असेल तर त्याला करिअरच्या अनेक संधी पुढे उपलब्ध होतात, असा विश्वास कौशल्य विकास, रोजगार व उद्योजकता मार्गदर्शन केंद्राच्या अधिकाऱ्यांनी व्यक्त केला आहे.
‘या’ विद्यार्थ्यांना सर्वाधिक संधी
दहावी- बारावी उत्तीर्ण, आय.टी.आय. वेल्डर, फिटर, डिप्लोमा, पदवीधर, ऑफिस असिस्टंट, इलेक्ट्रीशियन, मशिन ऑपरेटर, बी. ए, बी. कॉम, एम. कॉम, अशी शैक्षणिक पात्रता असलेल्या विद्यार्थ्यांना या रोजगार मेळाव्यातून पुढे करिअरचा दरवाजा खुला होतो. रोजगार मेळाव्याला जाताना स्वत:चा बायोडेटा, वैयक्तिक व शैक्षणिक कागदपत्रांच्या तीन-तीन झेरॉक्स प्रती त्या विद्यार्थ्यांसोबत ठेवाव्या लागतात.
सोलापूरच्या विद्यार्थ्यांना ‘येथे’ मिळेल माहिती
सोलापूरसह शेजारील जिल्ह्यातील उद्योजकांच्या मागणीनुसार प्रत्येक तीन महिन्याला रोजगार मेळावा घेतला जातो. एखाद्याला मेळाव्याबद्दल अधिक माहिती हवी असल्यास जिल्हा कौशल्य विकास, रोजगार व उद्योजकता मार्गदर्शन केंद्राच्या ०२१७-२९९२९५६ या क्रमांकावर संपर्क करता येईल. याशिवाय प्रत्यक्ष भेटीद्वारे माहिती हवी असल्यास सोलापूर महापालिकेसमोरील नॉर्थकोटमधील जिल्हा कौशल्य विकास, रोजगार व उद्योजकता मार्गदर्शन केंद्रात यावे लागेल.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.