मुंबई - पंतप्रधान नरेंद्र मोदी यांच्यासाठी जास्तीत जास्त खासदार निवडून आणण्यासाठी भाजप-शिवसेनेने युतीत उमेदवारांची सेटलमेंट करण्याची रणनीती आखली आहे. त्याचबरोबर भाजपने आयारामांना पायघड्या घालण्याचे धोरण अवलंबले आहे. 

शिवसेना सातारा लोकसभा मतदारसंघ लढवत आहे. या ठिकाणी त्यांच्याकडे उमेदवार नसताना भाजपने शिवसेनेला मदत केली. या मतदारसंघात मूळचे राष्ट्रवादी कॉंग्रेसचे, मात्र भाजपमध्ये गेलेले नरेंद्र पाटील यांना रातोरात शिवबंधनात अडकवले. "मातोश्री'वर शिवसेना पक्षप्रमुख उद्धव ठाकरे यांची पाटील यांनी भेट घेतली. त्यानंतर साताऱ्यामधून पाटील यांनी प्रचाराला सुरवात केली. याचबरोबर शिवसेनेने पालघरची जागा प्रतिष्ठेची करीत भाजपकडून युती करताना खेचून घेतली. त्यानंतर पालघरमध्ये सक्षम उमेदवार नाही म्हणून पालघरचे भाजपचे खासदार राजेंद्र गावित यांना शिवसेनेत प्रवेश दिला आणि त्यांच्या खांद्यावर भगवा दिला. भाजपनेही या दोन ठिकाणी उदार मनाने शिवसेनेला उमेदवार दिले. या लोकसभा निवडणुकीत राज्यातून जास्तीत जास्त खासदार निवडून आणणे हे भाजपचे उद्दिष्ट असून, यासाठी मित्रपक्ष शिवसेनेबरोबर उदार मनाने तडजोड करणे, ही रणनीती भाजपने आखल्याचे सांगितले जाते.