मुंबई -  राज्यातील सार्वत्रिक निवडणुकीच्या शेवटच्या टप्प्यासाठी आज दिग्गज नेत्यांच्या तोफा धडाडल्याने प्रचाराचा पारा शिगेला पोचला होता. पंतप्रधान नरेंद्र मोदी यांनी मुंबईत, काँग्रेस अध्यक्ष राहुल गांधी यांनी संगमनेर येथे, तर महाराष्ट्र नवनिर्माण सेनेचे अध्यक्ष राज ठाकरे यांनी नाशिक येथे जाहीरसभा घेत प्रचाराची राळ उडवून दिली. 

मुंबईतील वांद्रे कुर्ला कॉम्लेक्‍समध्ये झालेल्या महायुतीच्या पहिल्या विजय संकल्पसभेत बोलताना पंतप्रधान नरेंद्र मोदी यांनी सरकारने केलेल्या कामांचा पाढा वाचत पुन्हा राष्ट्रीय लोकशाही आघाडीलाच (एनडीए) मतदान करण्याचे आवाहन उपस्थितांना केले. 

या सभेला शिवसेना पक्षप्रमुख उद्धव ठाकरे हे देखील उपस्थित होते. नाशिकमध्ये ‘मनसे’चे अध्यक्ष राज ठाकरे यांनी शेवटच्या जाहीरसभेत केंद्र आणि राज्य सरकारचे अक्षरशः वाभाडे काढत पंतप्रधान नरेंद्र मोदी आणि भाजपचे अध्यक्ष अमित शहा यांना धारेवर धरले. काहीशा विलंबाने सुरू झालेल्या संगमनेर येथील सभेत बोलताना काँग्रेस अध्यक्ष राहुल गांधी यांनी अनिल अंबानींना हजारो कोटी रुपयांचा लाभ मिळवून देणाऱ्या ५६ इंचाच्या छातीने तरुणांना मात्र रोजगार मिळवून दिला नाही, असा टोला पंतप्रधान मोदींना  लगावला.