राज्यात इंधनाचे दर गगनाला भिडले आहेत. पेट्रोलच्या दरांनं शंभरी पार केली आहे तर डिझेलनं शंभरीकडे वाटचाल सुरु केली. पेट्रोल आणि डिझेलच्या दरवाढीमुळे सर्वसामान्य त्रस्त झाले आहेत. मागील काही दिवसांपूर्वी मुंबईतील एका कार्यक्रमात उपमुख्यमंत्री अजित पवार यांनी इंधनावीर टॅक्स केंद्र सरकारनं कमी करावेत, असं म्हटलं होतं. आज, सोमवारपासून इंधन दरवाढीविरोधात राज्यात काँग्रेसनं आंदोलन छेडलं आहे. यावर प्रतिक्रिया देताना चंद्रकांत पाटील यांनी राज्य सरकारवर टीका केली आहे.

इंधन दरवाढीसाठी सरसकट केंद्राकडे बोट दाखवणं चुकीचं आहे. राज्य सरकारनं कर कमी केला तर इंधनाचे दर नियंत्रणात राहीतल, असं चंद्रकांत पाटील म्हणाले आहेत. चंद्रकांत पाटील यांच्या या वक्तव्यावर सत्ताधारी पक्ष काय प्रतिक्रिया देतोय, याकडे सर्वांचं लक्ष लागलं आहे.

पेट्रोल, डिझेल व एलपीजी गॅसच्या किमती भरमसाठ वाढवल्या आहेत. पेट्रोलने 100 रुपये लिटरचा टप्पा पार केला असून डिझेल 93 रुपये लिटर झाले आहे. ही भाववाढ अशीच चालू राहिली तर डिझेल 100 रुपये लिटर होण्यास फार दिवस लागणार नाहीत. स्वयंपाकाचा गॅसही 900 रुपये झाला आहे. या महागाईमुळे लोकांचे जगणे कठीण झाले आहे.

1000 ठिकाणी काँग्रेसचं आंदोलन..

इंधनातील दरोडेखोरी विरोधात सोमवारी सकाळी ११ वाजता राज्यभर एकाचवेळी एक हजार ठिकाणी, प्रत्येक विधानसभा मतदारसंघात किमान तीन पेट्रोल पंपांवर आंदोलन करून मोदी सरकारचा तीव्र निषेध केला जाणार, असल्याचं महाराष्ट्र प्रदेश काँग्रेस कमिटीचे अध्यक्ष नाना पटोले यांनी सांगितलं.