सोलापूर : इयत्ता बारावीच्या निकालानंतर आता पदवीच्या प्रवेशाची लगबग सुरू झाली आहे. पदवीच्या प्रवेशाची संपूर्ण प्रक्रिया महाविद्यालय स्तरावरूनच होणार आहे. त्याठिकाणी विद्यार्थ्यांना अर्ज उपलब्ध असतील, महाविद्यालयाकडूनच प्रवेशाचे वेळापत्रक जाहीर होईल, अशी माहिती पुण्यश्लोक अहिल्यादेवी होळकर सोलापूर विद्यापीठाकडून देण्यात आली.

यंदाच्या शैक्षणिक वर्षापासून पदवी व पदव्युत्तर पदवीसाठी नवीन राष्ट्रीय शैक्षणिक लागू होणार आहे. प्रवेशावेळी विद्यार्थ्यांना हे धोरण समजून घ्यावे लागणार आहे. पदवी आता चार वर्षांची करता येणार असून पदव्युत्तर पदवी एक वर्षाची असेल. गुणांची टक्केवारी व क्रेडिट दोन्ही विद्यार्थ्यांना घ्यावे लागतील. दरम्यान, प्रवेशासाठी लागणारी कागदपत्रे आताच विद्यार्थ्यांनी काढून घ्यावीत. काही दिवसांत पदवीच्या प्रवेशाला सुरवात होणार आहे. नवीन धोरणानुसार परीक्षेचा पॅटर्न ६०-४० असा असणार असून ६० गुणांची परीक्षा विद्यापीठाकडून तर ४० गुण महाविद्यालयाच्या हाती असणार आहेत.

‘पदव्युत्तर पदवी’च्या प्रवेशासाठी प्रवेशपूर्व परीक्षा

पुण्यश्लोक अहिल्यादेवी होळकर सोलापूर विद्यापीठ परिसर व संलग्न महाविद्यालयामध्ये शिकवल्या जाणाऱ्या विविध अभ्यासक्रमाच्या प्रवेश पात्र विद्यार्थ्यांनी विद्यापीठाच्या www.sus.ac.in या लिंकवरून ऑनलाइन अर्ज करावेत. प्रवेशपूर्व परीक्षा वेब बेस्ड ऑनलाइन प्रणालीद्वारे होणार आहे. परीक्षेची लिंक २४ तास उपलब्ध राहणार आहे. २६ मेपर्यंत प्रवेशपूर्व परीक्षेसाठी ऑनलाइन नोंदणी करता येणार आहे. प्रवेशपूर्व परीक्षेची पूर्वतयारी सराव चाचणी २७ मे रोजी होणार आहे. अंतिम प्रवेशपूर्व परीक्षा २९ ते ३१ मे या कालावधीत होणार आहे. परीक्षेसाठी लिंक २४ तास उपलब्ध असेल, पण विद्यार्थ्यांचा परीक्षा कालावधी केवळ एक तासाचाच असणार आहे.

‘पेट’ची परीक्षा ३० जूनला; परीक्षेसाठी वेब बेस्ड प्रणाली

पुण्यश्लोक अहिल्यादेवी होळकर सोलापूर विद्यापीठाच्या वतीने २०२४-२५ या शैक्षणिक वर्षासाठी ‘पेट’ घेण्याचे नियोजन केले आहे. ३० जून रोजी रविवारी ही परीक्षा होईल. यंदा विद्यापीठात ‘पीएच.डी’च्या जवळपास ४७५ जागा आहेत. देश-विदेशातील विद्यार्थ्यांना या परीक्षेत सहभाग घेता यावा म्हणून ‘पेट’ देखील वेब बेस्ड घेण्याचे विद्यापीठाचे नियोजन आहे. परीक्षेची लिंक विद्यार्थ्यांना मोबाइलवर पाठविली जाईल. परीक्षा देताना तो विद्यार्थी विद्यापीठाच्या अधिकाऱ्यांना दिसणार आहे. तीनवेळा तो कॅमेऱ्यासमोरून हलला की तो परीक्षेतून बाद होणार आहे.

३० जून रोजी ‘पेट’ घेण्याचे नियोजन

पदवीची प्रवेश प्रक्रिया महाविद्यालय स्तरावर होईल तर पदव्युत्तर पदवीच्या प्रवेशासाठी २९ ते ३१ मे या काळात प्रवेशपूर्व परीक्षा होणार आहे. दुसरीकडे ३० जून रोजी ‘पेट’ घेण्याचे नियोजन आहे. वेब बेस्ड ‘पेट’ घेण्यासंबंधीचे नियोजन सुरू असून जेणेकरून देश-विदेशातील विद्यार्थ्यांनाही ही परीक्षा देता येईल.

- डॉ. लक्ष्मीकांत दामा, प्र कुलगुरु, पुण्यश्लोक अहिल्यादेवी होळकर सोलापूर विद्यापीठ