सोलापूर : राज्यातील 355 पैकी 172 तालुक्‍यांमध्ये सरासरीच्या 25 ते 75 टक्‍के पाऊस पडला आहे. सरकारने जाहीर केलेल्या 172 तालुक्‍यांतील बाधित क्षेत्राचा शासकीय यंत्रणेकडून "महामदत' या ऍपद्वारे सर्व्हे सुरू झाल्याचे नैसर्गिक आपत्ती विभागाकडून सांगण्यात आले. मात्र, नुकसान भरपाई कधीपर्यंत मिळणार हे अस्पष्टच असल्याने खरीप वाया गेलेल्या शेतकऱ्यांना रब्बी हंगामाची चिंता सतावत आहे. 

यंदा राज्यातील बळिराजाला वरुणराजाने हुलकावणी दिली. त्यामुळे आर्थिक संकटात सापडलेल्या शेतकऱ्यांचा खरीप वाया गेल्याने यंदाची दिवाळी अंधारातच जाणार असल्याचे दिसून येत आहे. मुख्यमंत्री देवेंद्र फडणवीस यांच्या निर्देशानुसार दुष्काळी स्थितीचा अहवाल बुधवारपर्यंत अपेक्षित आहे. राज्यात मोठ्या प्रमाणावर जलयुक्‍त शिवार योजनेची कामे होऊनही अशी स्थिती निर्माण झाल्याने या योजनेतील कामांबाबत शंका उपस्थित होत आहेत. 

ऐन दिवाळीत पाणीटंचाई 

पावसाअभावी सोलापूर, औरंगाबाद, नाशिक, अमरावती या जिल्ह्यांची पाणीपातळी एक ते अडीच मीटरने खालावली आहे. लघू व मध्यम प्रकल्प कोरडे पडले असून, धरणातील पाणीसाठाही झपाट्याने कमी होत आहे. त्यामुळे ऐन दिवाळीत नागरिकांना पाण्यासाठी भटकंती करावी लागत आहे. त्या पार्श्‍वभूमीवर टंचाई आराखडा तयार करण्याचे काम युद्धपातळीवर सुरू झाले आहे. सोलापूर, लातूर, पुणे, औरंगाबाद, नाशिक, अमरावती या जिल्ह्यांतील जिल्हाधिकाऱ्यांकडे गावकऱ्यांनी टॅंकरची मागणी केली आहे. 

टंचाईग्रस्त विभागनिहाय तालुके 

कोकण : 3 
नाशिक : 27 
पुणे : 30 
कोल्हापूर : 10 
औरंगाबाद : 26 
लातूर : 29 
अमरावती : 25 
नागपूर : 22