सोलापूर : सीईटी सेलकडून निकाल जाहीर झाल्यावर १३ दिवसांनी शनिवारपासून (ता. २८) अभियांत्रिकी प्रवेशाला सुरवात झाली आहे. उच्च व तंत्रशिक्षण विभागाने केलेल्या नियमांतील बदलानुसार यंदा तीनऐवजी चार केंद्रिभूत फेऱ्या होणार आहेत. तर सीईटी निकालाला १५ दिवस उलटले तरी अद्याप फार्मसी अभ्यासक्रमाच्या प्रवेशाचे वेळापत्रक जाहीर झालेले नाही.

अभियांत्रिकी, फार्मसी, एमबीए आदी अभ्यासक्रमांसाठी घेण्यात येणाऱ्या प्रवेश पूर्व परीक्षा सीईटीचा निकाल १६ आणि १७ जून रोजी निकाल जाहीर झाला. यंदाही नव्या नियमांच्या नावाखाली प्रवेशाचे वेळापत्रक लांबले आहे. गतवर्षीही उशिरा प्रवेश प्रक्रियेमुळे राज्यभरातील ३४ टक्के जागा रिक्त राहिल्या होत्या. अखेर शनिवारपासून अभियांत्रिकी प्रवेश प्रक्रियेला सुरवात झाली असून उच्च व तंत्रशिक्षण विभागाने नवे नियम जाहीर केले आहेत. त्यानुसार तंत्रनिकेतन प्रमाणे अभियांत्रिकीच्याही तीनऐवजी चार फेऱ्या होणार आहेत. तसेच पहिल्या, दुसऱ्या आणि तिसऱ्या फेरीत अनुक्रमे एक, तीन आणि सहा पसंतीक्रमांकापैकी एक महाविद्यालय मिळाल्यास त्या विद्यार्थ्याचा अर्ज त्या महाविद्यालयासाठी लॉक होणार आहे.

विशेष म्हणजे चार फेऱ्या पूर्ण झाल्यानंतरच संस्थात्मक प्रवेश फेरी होणार आहे. या फेरीची यादीही गुणवत्तेनुसारच प्रसिद्ध केली जाणार आहे. तसेच या फेरीसाठी संस्थेने अर्ज नाकारल्यास विद्यार्थी सीईटी कक्षाच्या संकेतस्थळावरून अर्ज करू शकतील. त्यामुळे महाविद्यालय स्तरावरून होणारी मनमानी थांबणार असल्याने विद्यार्थ्यांचे नुकसान टळणार आहे.

अभियांत्रिकी प्रवेशाचे वेळापत्रक

• ऑनलाइन अर्ज अंतिम मुदत : ८ जुलै

• कागदपत्रांची पडताळणी : ९ जुलै

• अंतरिम गुणवत्ता यादी : १२ जुलै

• अर्जातील त्रुटींची दुरुस्ती : १३ ते १५ जुलै

• अंतिम गुणवत्ता यादी : १७ जुलै

लवकरच वेळापत्रक जाहीर होण्याची आशा

फार्मसी अभ्यासक्रमाचे वेळापत्रक अद्याप जाहीर झालेले नाही. दरवर्षी अभियांत्रिकी प्रवेशानंतरच फार्मसी अभ्यासक्रमाचे वेळापत्रक जाहीर होते. लवकरच वेळापत्रक जाहीर होईल, अशी अपेक्षा आहे.

- डॉ. एम. एस. कलशेट्टी, प्राचार्य, वि. गु. शिवदारे फार्मसी महाविद्यालय, सोलापूर