मध्य महाराष्ट्रासह मराठवाड्यासाठी इशारा
पुणे - मध्य महाराष्ट्रासह मराठवाड्यात वादळी वारा आणि विजांच्या कडकडाटांसह शुक्रवारपर्यंत (ता. ८) मुसळधार पाऊस होईल, असा इशारा हवामान खात्याने आज दिला.

अरबी समुद्राच्या किनारपट्टीवर सोसाट्याचा वारा वाहणार असून, मच्छीमारांनी समुद्रात जाऊ नये, असेही सूचित करण्यात आले असून, सोमवारी पुण्यासह मध्य महाराष्ट्रात जोरदार पाऊस झाला.

कोकण, गोवा आणि मध्य महाराष्ट्रात काही ठिकाणी तर मराठवाड्यात तुरळक ठिकाणी मंगळवारी (ता. ५) पावसाची शक्‍यता आहे. पश्‍चिम-मध्य अरबी समुद्रावरील कमी दाबाच्या क्षेत्राची तीव्रता कमी झाली आहे. ते वादळ आता सोमालिया किनारपट्टीकडे सरकले आहे. परंतु, पूर्व-मध्य अरबी समुद्रावरील ‘महा’ चक्रीवादळाची तीव्रता आणखी वाढली आहे. त्याचे रूपांतर अत्यंत तीव्र चक्रीवादळात झाले असून, ते आता पूर्व-मध्य आणि लगतच्या पश्‍चिम-मध्य अरबी समुद्रावर आहे. पुढील २४ तासांत ते गुजरात किनारपट्टीच्या दिशेने वळण्याची शक्‍यता आहे. 

अतिवृष्टीचा इशारा
‘महा’ चक्रीवादळ बुधवारी (ता. ६) मध्यरात्री आणि गुरुवारी (ता. ७) पहाटे दीव ते पोरबंदरदरम्यान गुजरातची किनारपट्टी पार करण्याची शक्‍यता आहे. अंदमान निकोबार बेटे आणि केरळ राज्यात मंगळवारी अतिवृष्टीचा इशारा देण्यात आला आहे. तर, मध्य महाराष्ट्रासह मराठवाड्यात वादळी वारा आणि विजांच्या कडकडाटांसह मुसळधार पावसाची शक्‍यता आहे. बुधवारी (ता. ६) गुजरात आणि अंदमान-निकोबार भागात अतिवृष्टी; तर नाशिक, धुळे, नंदुरबारसह मध्य महाराष्ट्र आणि मराठवाडा परिसरात मुसळधार पावसाचा इशारा देण्यात आला आहे. गुरुवारी (ता. ७) गुजरातच्या काही भागांत अतिवृष्टी होण्याची शक्‍यता आहे. तसेच जम्मू-काश्‍मीर, हिमाचल प्रदेश, पंजाब, पूर्व राजस्थान, मध्य प्रदेशच्या पश्‍चिम भागात, हरियाना आणि अंदमान-निकोबार परिसरात मुसळधार पावसाची शक्‍यता आहे.