मुंबई - कर्नाटकमध्ये सत्तांतरासाठी कंबर कसून सुरू असलेल्या ‘ऑपरेशन कमळ’चे राजकीय नाट्य मुंबईत आकाराला येत असताना एका भाजपच्या उत्साही कार्यकर्त्यामुळेच बिंग फुटल्याचे उघड झाले.  काँग्रेसमधून बंडखोरीच्या तयारीत असलेल्या तीन आमदारांना ज्या हॉटेलमध्ये ठेवले आहे त्याचा सुगावा लवकर लागल्याने काँग्रेसने देखील तातडीने हालचाली सुरू करत भाजपच्या अडचणी वाढवल्या आहेत. 

महाराष्ट्रात भाजप सरकार असल्याने आमदारांची सुरक्षित व गोपनीय देखरेख करणे सोयीचे आहे. त्यामुळेच पवई येथील रेनिसन्स या पंचतारांकित हॉटेलमध्ये या तीन आमदारांनी मुक्‍काम ठोकला आहे. या आमदारांना निरोप देण्यासाठी मध्यस्थी करणारा एक भाजप कार्यकर्ता हॉटेलमधे सतत ये-जा करत असल्याने संशय बळावला होता. आमदारांना कोणत्या हॉटेलमध्ये ठेवले आहे, याचा सुगावा लागत नव्हता. मात्र, संबधित भाजप कार्यकर्त्याच्या गाडीत छोटा भाजपचा झेंडा लावल्याने त्याच्यावर काँग्रेस कार्यकर्त्यांनी पाळत ठेवली. हा कार्यकर्ता सतत या हॉटेलमधे ये-जा करत असल्याचे निदर्शनास आल्यानंतर हॉटेलमध्ये छुप्या पद्धतीने तपास सुरू झाला. हॉटेलमध्ये विविध पक्षांशी संबधित कामगार संघटनांचे कर्मचारी देखील आहेत. त्यापैकी एकाने या आमदारांचा गुपचूप व्हिडिओ केला. बंडखोरीच्या पवित्र्यात असलेल्या आमदारांचा ठावठिकाणा कळाल्याने कर्नाटक व महाराष्ट्र काँग्रेसमधील दोन नेत्यांनी पुढचा मोर्चा सांभाळला.

या आमदारांना बाहेर पडताना त्यांच्यावर पाळत ठेवण्याची जबाबदारी काँग्रेसने विश्‍वासू कार्यकर्त्यांवर सोपवली. काँग्रेसचे कर्नाटकमधील किंगमेकर डी. शिवकुमार यांनी तात्काळ हालचाली करत काँग्रेस बंडखोरांशी संपर्क साधण्याचा प्रयत्न केला. येडियुरप्पांनी मुख्यमंत्रिपदाची शपथ घेतल्यानंतरही भाजपला काँग्रेस आमदार फोडता आले नव्हते. शिवकुमार यांनी या आमदारांशी संपर्क साधत निर्वाणीचा इशारा दिला आहे. ते उद्या मुंबईत दाखल होणार असून, त्यानंतर बंडखोरांना भेटण्याचाही प्रयत्न करतील.

तेरा आमदार नॉट रिचेबल
काँग्रेसच्या सर्व आमदारांना फोनवरून उद्या (ता. १७) सायंकाळपर्यंत बंगळूरला येण्यास सांगण्यात आले आहे. काँग्रेसच्या सर्व आमदारांना फोनवरून तातडीने बंगळूरला येण्याच्या सूचना देण्यात आल्याचे समजते. परंतु १३ आमदारांचे दूरध्वनी क्रमांक नॉट रिचेबल येत असल्याचे सांगण्यात आले. दरम्यान, उत्तर कर्नाटकातील आमदारांनी काँग्रेसचे प्रभारी वेणुगोपाल यांच्याविरोधातच तक्रार केली आहे.