पुणे - महाराष्ट्र दुय्यम सेवा अराजपत्रित गट-ब मुख्य परीक्षा २०२१ मधील पोलीस उपनिरीक्षक संवर्गाची सर्वसाधारण गुणवत्ता यादी जाहीर करण्यात आली आहे. महाराष्ट्र लोकसेवा आयोगातर्फे ५८५ उमेदवारांची ही यादी संकेतस्थळावर प्रसिद्ध करण्यात आली आहे.

त्यात अजय कळसकर यांनी ३२९.५० गुण मिळवत प्रथम क्रमांक पटकावला असून बाळासाहेब दराडे यांनी ३२६.५० गुण मिळवत द्वितीय क्रमांक प्राप्त केला आहे. यंदा तिसरा क्रमांक सागर भाबड आणि रशीद शेख यांनी ३२३ गुण मिळवत संयुक्तपणे पटकावला आहे.

परीपत्रकात आयोगाने अनाथ आरक्षणासंदर्भात स्पष्टता दिली आहे. आयोग म्हणतो, ‘परीक्षेतील पोलीस उप निरीक्षक संवर्गाच्या अनाथ आरक्षणासंदर्भात ५ एप्रिल २०२४ रोजीच्या आदेशानुसार अनाथांची २ पदे प्रस्तुत जाहिरातीमध्ये समाविष्ट करून एकूण ३७८ पदांसाठी सर्वसाधारण गुणवत्ता यादी प्रसिद्ध करण्यात आली आहे.

ही सर्वसाधारण गुणवत्ता यादी ही निव्वळ तात्पुरत्या स्वरुपाची आहे. उमेदवारांच्या अर्जामधील विविध दाव्यांच्या अनुषंगाने अंतिम निकालापूर्वी पडताळणीअंती काही उमेदवारांच्या दाव्यांमध्ये किंवा शिफारशीमध्ये बदल होऊ शकतो.’