मुंबई : महाराष्ट्र नवनिर्माण सेनेचे अध्यक्ष राज ठाकरे यांचे पुत्र अमित ठाकरे यांच्या विवाहसोहळ्यात काँग्रेसचे चाणक्य अहमद पटेल यांनी लावलेली हजेरी सर्वांचा चर्चेचा विषय बनला आहे. राज ठाकरे आणि अहमद पटेल यांच्यात 20 मिनिटे चर्चा झाल्याने महाआघाडीत मनसे सहभागी होणार का, याबाबत चर्चा सुरु झाल्या आहेत.

भाजपच्या पराभवासाठी काँग्रेसने विविध राज्यांत प्रादेशिक पक्षांशी आघाडी करण्याचा निर्णय घेतला आहे. ‘मुंबई मिरर’ने दिलेल्या वृत्तानुसार राज ठाकरे यांनी अहमद पटेल यांची खासगीत भेट घेतली. राज ठाकरे यांनी लग्नानिमित्त आलेल्या निमंत्रणामुळे अहमद पटेल हजर होते. राज ठाकरे आणि अहमद पटेल यांच्यात 20 मिनिटे खासगीत बैठक झाल्याचे वृत्त असून या बैठकीनंतर राज ठाकरे देखील महाआघाडीत सामील होणार असल्याची चर्चा रंगली आहे.

अमित ठाकरे यांचा विवाहसोहळा नुकताच पार पडला. या विवाहसोहळ्यात राष्ट्रवादी काँग्रेसचे अध्यक्ष शरद पवार आणि त्यांचे कुटुंबीय उपस्थित होते. राज ठाकरेंनी या विवाहसोहळ्यासाठी राहुल गांधी यांना देखील निमंत्रण दिले होते. या विवाहसोहळ्यात काँग्रेस पक्षश्रेष्ठींच्या वतीने अहमद पटेल हे सहभागी झाले होते. अहमद पटेल हे गांधी घराण्याचे निकटवर्तीय म्हणून ओळखले जातात. तसेच त्यांची काँग्रेसचे चाणक्य म्हणूनही ओळख आहे. लोकसभा निवडणुकीत मनसेला दोन ते तीन जागा देण्याची राष्ट्रवादी काँग्रेसची तयारी आहे, अशीही चर्चा आहे.