मुंबई: एसटी कामगारांच्या प्रलंबित मागण्यांवर तोडगा काढण्यासाठी बुधवारी (ता. 23) दुपारी 3 वाजता व्यवस्थापकीय संचालक रणजित सिंह देओल यांनी तातडीची बैठक बोलवली आहे. या बैठकाला कामगार संघटनांचे अध्यक्ष उपस्थित राहणार असून कर्मचाऱ्यांच्या प्रश्नांवर तोडगा निघण्याची शक्‍यता आहे. 

एसटी कर्मचाऱ्यांचे वेतनवाढ, जानेवारी महिन्यांपासून 3 टक्के महागाई भत्ता आदी प्रलंबित मागण्यांवर अद्याप तोडगा निघाला नाही. शिवाय कर्मचाऱ्यांना दिवाळी भेट, दिवाळीपूर्वीचे वेतन अद्याप कर्मचाऱ्यांना मिळालेले नाही. त्यानिषेधार्थ एसटीच्या मान्यताप्राप्त राज्य एसटी कामगार संघटनांसह इतर कामगार संघटनांनी 25 ऑक्‍टोबरला एसटीच्या सर्व विभागीय कार्यालय आणि मध्यवर्ती कायर्शाळेसमोर निदर्शने करण्याचा इशारा दिला होता. त्यामुळे ऐन दिवाळीच्या हंगामात एसटी सेवा विस्कळित होण्याची शक्‍यता होती. अखेर एसटी महामंडळाने प्रलंबित मागण्यांवर तोडगा काढण्यासाठी बैठकीचे आयोजन केले आहे. 

मात्र या बैठकीत कर्मचाऱ्यांच्या मागण्यांवर ठोस तोडगा न निघाल्यास 25 ऑक्‍टोबरला कर्मचारी निदर्शेने करण्यावर ठाम असल्याचे सांगण्यात आले.