पुणे - ‘‘अतिवापरामुळे नैसर्गिक साधनसंपत्तीचा तुटवडा निर्माण होत आहे. तसेच, पर्यावरणीय समस्या वाढत आहेत. भविष्यात याहीपेक्षा बिकट आव्हाने निर्माण होतील. त्यांचा सामना करण्यासाठी व पर्यायी उपाय शोधण्यासाठी विद्यार्थ्यांनी विज्ञानाचा अभ्यास करणे आवश्‍यक आहे,’’ असे मत शास्त्रज्ञ डॉ. अनिल काकोडकर यांनी व्यक्त केले.

शालेय मुलांमध्ये विज्ञानाविषयीची आवड निर्माण होण्यासाठी द नॅशनल ॲकॅडमी ऑफ सायन्स आणि सावित्रीबाई फुले पुणे विद्यापीठ यांच्यावतीने ‘आयुका’ येथे विद्यार्थी आणि शास्त्रज्ञ यांच्या संवादाचा कार्यक्रम आयोजित केला होता, या वेळी ते बोलत होते. ‘आयुका’चे संचालक डॉ. शोमक रायचौधरी, ॲकॅडमीच्या माजी अध्यक्षा मंजू शर्मा, प्रा. परमजीत खुराना उपस्थित होते. खुराना यांनी या वेळी जीवशास्त्रीय विज्ञान याविषयी मार्गदर्शन केले.

डॉ. काकोडकर म्हणाले, ‘‘विज्ञानातील संशोधनातून नावीन्यपूर्ण बाबी समोर येतात. त्यातून जिज्ञासू वृत्ती जागृत होते. नवीन काहीतरी केल्याचा आनंदही मिळतो. त्यामुळे जास्तीत जास्त विद्यार्थ्यांनी विज्ञान क्षेत्राचा अभ्यास करावा.’’ डॉ. रायचौधरी म्हणाले, ‘‘अवकाश संशोधन हे एक व्यापक क्षेत्र आहे. अवकाशातील घडामोडींबाबत वेगवेगळे संशोधन जगभरात केले जात आहे. विविध प्रकल्प, तंत्रज्ञान विकसित करण्याचे काम सध्या होत असून, भविष्यात या संधी मोठ्या प्रमाणात वाढणार आहेत. विद्यार्थ्यांनी ही बाब लक्षात घेऊन त्यादिशेने  प्रयत्न करावेत.’’