पुणे : आम्ही तलवार म्यान करत नसतो, एकदा हातात घेतल्यानंतर आम्ही युद्ध केल्याशिवाय आम्ही माघार घेत नसतो. आम्ही पूर्ण ताकदीने विधानसभा निवडणुका लढणार आहोत. माझा प्रत्येक कार्यकर्ता ताकदीने लढेल आणि प्रत्येक कार्यकर्त्याच्या मागे आम्ही ठामपणे उभे राहणार आहोत, असे शरद पवार यांनी स्पष्ट केले.

राष्ट्रवादी'चे नेते अजित पवार यांनी आज (ता.27) अचानक विधानसभा सदस्यत्वाचा राजीनामा दिल्याने राज्याच्या राजकारणात एकच खळबळ उडाली. त्यानंतर घेतलेल्या पत्रकार परिषदेत पवार बोलत होते. पत्रकार परिषेदरम्यान, राष्ट्रवादीच्या मोठ्या नेत्याने राजीनामा दिला आहे याचा निवडणुकांवर काय परिणाम होईल या प्रश्नाला उत्तर देताना अजित पवारांच्या राजीनाम्याचा आगामी विधानसभा निवडणुकांवर कोणताही परिणाम होणार नसल्याचे यातून स्पष्ट केले आहे. 

अजित पवार यांच्या राजीनाम्याबद्दल मला कुठल्याही प्रकारची माहिती नव्हती, पण, ते माझे नाव ईडीच्या कारवाईत आल्यामुळे अजित पवार अस्वस्थ होते. त्यांनी दिलेल्या राजीनाम्याचे कारण मलाही जाणून घ्यायचे आहे. अजित पवारांनी राजीनाम्याविषयी माझ्याशीही कुठल्याही प्रकारची चर्चा केली नसल्याचेही त्यांनी यावेळी स्पष्ट केले.