मुंबई : आज दहावीच्या विद्यार्थ्यांचा निकाल लागला असून मुख्यमंत्री उद्धव ठाकरे यांनी विद्यार्थ्यांना शुभेच्छा दिल्या आहेत. आपापल्या आवडत्या क्षेत्रातील करिअरसाठी आणि उज्ज्वल शैक्षणिक वाटचालीसाठी मेहनतीची तयारी ठेवा असंही अवाहन करण्यात आलं आहे.

(SSC Result 2022)

"शिक्षण प्रवासातील एक टप्पा आपण यशस्वीपणे पार केला आहे, या यशासाठी आपले सर्वांचे मनःपूर्वक अभिनंदन ! आता पुढील शैक्षणिक वाटचालीत करिअर म्हणून वेगवेगळी क्षेत्रं खुणावत असतील. त्यामध्ये उज्ज्वल यश मिळविण्यासाठी प्रयत्नपूर्वक आणि डोळसपणे पावले टाका. अभ्यासात मेहनतीची तयारी ठेवा, यश निश्चितच मिळेल. त्यासाठी हार्दिक शुभेच्छा!"असं मुख्यमंत्र्यांनी शुभेच्छा संदेशात म्हटले आहे.

दरम्यान आज दहावीच्या विद्यार्थ्यांच्या परिक्षेचा निकाल लागला असून यामध्ये ९६.९४ टक्के विद्यार्थ्यांनी यश मिळवले आहे. यात मुलींनी बाजी मारली असली तरी यंदा निकालाचा टक्का ९७.९६ एवढा आहे. २०२०च्या तुलनेत निकालात तब्बल १.६४ टक्के वाढ झाली आहे. सर्वाधिक निकाल कोकण विभागाचा (९९.२७ टक्के) लागला आहे.

तर सर्वात कमी निकाल हा नाशिक (९५.९० टक्के) विभागाचा लागला आहे. एकूण १५,६८,९७७ लाख विद्यार्थ्यांनी परीक्षा दिली होती. त त्यापैकी १५,२१,००३लाख विद्यार्थी उत्तीर्ण झाले आहेत. दरम्यान दहावीच्या परीक्षेत उत्तीर्ण झालेल्यांचे मुख्यमंत्री उद्धव ठाकरे यांनी अभिनंदन केले आहे. तसेच या सर्वांना पुढील उज्ज्वल शैक्षणिक वाटचालीसाठी हार्दिक शुभेच्छा दिल्या आहेत.