पुणे - पुढील दोन दिवसानंतर मराठवाडा (Marathwad) आणि विदर्भात (Vidarbha) तुरळक ठिकाणी विजांच्या कडकडाटासह पाऊस (Rain) आणि गारा (Hail) पडण्याचा अंदाज हवामान (Environment) विभागाने दिला आहे. सध्या सक्रिय असलेल्या पश्‍चिमी चक्रावात आणि त्याच्या चक्राकार वाऱ्यांमुळे हरियाना, उत्तर प्रदेश, पंजाब, मध्य प्रदेश या भागात पावसासह गारपिटीचा इशारा हवामान विभागाने दिला आहे. परिणामी राज्यात ही पावसासाठी पोषक हवामान निर्माण होत आहे.

उत्तरेकडून येणाऱ्या वाऱ्यांमुळे राज्यात गारठा वाढला होता. त्यात अनेक ठिकाणी किमान तापमानाचा पारा १० अंशाच्या खाली नोंदला जात होता. मात्र आता उत्तर भारतातील थंडी कमी झाल्याने राज्यातही थंडीचा कडाका कमी होण्याची शक्यता आहे. तसेच राज्यात मंगळवारपासून (ता. २८) कोकण वगळता मध्य महाराष्ट्र, मराठवाडा आणि विदर्भात विजांच्या कडकडाटासह पावसाचा अंदाज आहे. त्याचबरोबर पुढील पाच दिवस संपूर्ण देशात थंडीची लाट नसेल.

राज्यात शनिवारी सर्वाधिक कमाल तापमान ३३.१ अंश सेल्सिअस सोलापूर तर नीचांकी तापमानाची नोंद १०.४ अंश सेल्सिअस जळगाव येथे झाली. पुणे शहर आणि परिसरात येत्या दोन दिवसानंतर ढगाळ वातावरणाची शक्यता हवामान विभागाने वर्तवली आहे. पुढील दोन दिवस शहरात आकाश मुख्यतः निरभ्र राहणार आहे. शहरात शनिवारी १२.८ अंश सेल्सिअस किमान तर ३२.१ अंश सेल्सिअस कमाल तापमानाची नोंद झाली.

गेल्या चार दिवसांपासून किमान तापमानात चढ-उतार कायम आहे. रात्री आणि पहाटे थंडीचा कडाका जाणवू लागला आहे. मात्र दिवसा ऊनाचा चटका ही कायम आहे. परंतु पुढील काही दिवस थंडी काहीशी कमी होण्याची शक्यता आहे.

पुणे परिसरात ढगाळ वातावरण

हवामान विभागाच्या माहितीनुसार सोमवारपासून शहर आणि परिसरात दुपारनंतर आकाश सामान्यतः ढगाळ (५५ ते ७५ टक्के) राहण्याची शक्यता आहे. त्यामुळे किमान तापमानाचा पारादेखील वाढेल. त्यामुळे पुण्यातील काही भागात किमान तापमान १५ तर काही ठिकाणी २० अंश सेल्सिअस पर्यंत जाण्याची शक्यता आहे.