कोल्हापूर : लोकसभा निवडणुकीच्या (Loksabha Elections) तोंडावर राज्यातील भाजप व राष्ट्रवादी अजित पवार गटाच्या (Ajit Pawar) नेत्यांच्या १३ कारखान्यांना १८९८ कोटी रुपयांचे कर्ज देण्यास राज्य सरकारने हमी दिली. राष्ट्रीय सहकार विकास निगमकडून हे कर्ज मिळणार आहे. आचारसंहितेपूर्वी झालेल्या मंत्रिमंडळाच्या बैठकीत हा निर्णय घेण्यात आला.

दरम्यान, कर्ज हमी मिळालेल्या १३ साखर कारखान्यांत आमदार डॉ. विनय कोरे (Vinay Kore) यांच्या वारणा साखर कारखान्याचा समावेश असून, या कारखान्याला ३५० कोटींच्या कर्जाला हमी मिळाली आहे. यात काँग्रेसचे बारामती लोकसभा (Baramati Loksabha) मतदारसंघातील आमदार संग्राम थोपटे यांच्याही कारखान्याचा समावेश आहे. थोपटे यांच्या राजगड साखर कारखान्यास (भोर) ८० कोटी रुपयांची कर्जहमी देण्यात आली आहे.

राज्यातील सत्ताधारी आणि विरोधी पक्षातील साखर कारखान्यांच्या प्रतिनिधींकडून सरकारकडे खेळत्या भांडवलावरील कर्जाच्या मागणीचा प्रस्ताव पाठवला होता. यावर आचारसंहितेपूर्वी राज्यातील प्रस्ताव पाठवलेल्या कारखान्यांची छाननी करून त्यानुसार सरकारच्या हमीवर कर्जाचे प्रस्ताव राष्ट्रीय सहकार विकास निगमला पाठविण्यासाठी सहकारमंत्री दिलीप वळसे-पाटील यांच्या अध्यक्षतेखाली मंत्रिमंडळ उपसमिती स्थापन करण्यात आली आहे.

यामध्ये उपमुख्यमंत्री अजित पवार आणि भाजपला समर्थन करणाऱ्या १३ साखर कारखान्यांची समितीने निवड केली. त्यामध्ये भाजपचे पाच राष्ट्रवादीचे सात आणि एक कारखाना काँग्रेसशी संबंधित आमदाराचा आहे. राष्ट्रवादी शरद पवार यांच्या गटातील काही आमदारांच्या कारखान्यांना ही मदत नाकारण्यात आल्याची माहिती समोर येत आहे. कर्जहमीचा प्रस्ताव एनसीडीसीला पाठविण्यात आला असून, त्यांची मान्यता मिळताच कर्जाची रक्कम सरकारकडे जमा होईल.

हमी मिळालेले कारखाने गटनिहाय असे

अजित पवार गट

• लोकनेते सुंदररावजी सोळंके साखर कारखाना (बीड) १०४ कोटी

• किसनवीर (सातारा) ३५० कोटी

• किसनवीर (खंडाळा) १५० कोटी

• लोकनेते मारोतराव घुले-पाटील ज्ञानेश्वर कारखाना (नेवासा) १५० कोटी

• अगस्ती (अहमदनगर) १०० कोटी

• अंबाजोगाई (बीड) ८० कोटी

• शिवाजीराव नागवडे (श्रीगोंदा) ११० कोटी

भाजपशी संबंधित

• संत दामाजी (मंगळवेढा) १०० कोटी

• वृद्धेश्वर (पाथर्डी) ९९ कोटी

• सहकारमहर्षी शंकरराव कोल्हे ( कोपरगाव) १२५ कोटी

• बसवराज पाटील यांचा विठ्ठलसाई (धाराशिव) १०० कोटी