मुंबई - कोपर्डी प्रकरणातील दोषींना फाशीची शिक्षा झाल्याने पीडितेला न्याय मिळाला, अशी प्रतिक्रिया मुख्यमंत्री देवेंद्र फडणवीस यांनी व्यक्त केली आहे.

कोपर्डी (ता. कर्जत) येथील अल्पवयीन मुलीवर अत्याचार करून खून झाला होता. या खटल्यातील दोषी जितेंद्र शिंदे, संतोष भवाळ आणि नितीन भैलुमे या तिघांनाही विशेष जिल्हा व सत्र न्यायाधीश सुवर्णा केवले यांनी दोषी ठरवत फाशीची शिक्षा सुनावली.

या निकालावर प्रतिक्रिया देताना मुख्यमंत्री म्हणाले, की उज्ज्वल निकम यांच्यासारख्या वकीलांनी न्यायालयात बाजू मांडली, मी त्यांचे अभिनंदन करतो. विक्रमी वेळेत खटल्याचे काम पूर्ण केले. आरोपींच्या वकीलांनी अनेकवेळा खटला पुढे ढकलण्यासाठी प्रयत्न केले. पण, त्यांना यश आले नाही. आरोपींनी फाशी होण्याची महाराष्ट्रातील महिलांची मागणी होती, आज न्यायालयाने तोच निकाल दिला आहे. हा निकाल न्यायव्यवस्थेवरील विश्वास वाढविणारा आहे.