मुंबई - ‘‘शहरातील विकसकांना भूखंड वाटले जातात; पण शिवसेनाप्रमुख बाळासाहेब ठाकरे यांच्या स्मारकासाठी भूखंड मिळत नाही, हे दुर्दैव आहे. महापौरांचा बंगला बाळासाहेबांच्या स्मारकाच्या नावाने कुणाच्या तरी हितासाठी गिळला जातो,’’ अशा शब्दांत मनसे अध्यक्ष राज ठाकरे यांनी गुरुवारी शिवसेना आणि राज्य सरकारवर तोफ डागली.

सकाळचे मोबाईल अॅप्लिकेशन डाऊनलोड करण्यासाठी क्लिक करा

शिवाजी पार्क येथील जिमखान्याची जागा टेनिस आणि बॅडमिंटन कोर्टसाठी राखीव आहे. तेथे अनेक वर्षांपासून हे खेळ खेळले जातात. तेथे प्रस्तावित महापौर निवासस्थान होऊ देणार नाही, असा इशाराही त्यांनी दिला. ठाकरे म्हणाले, मुंबईसारख्या शहरातील महापौर निवासस्थानासाठी वणवण भटकत आहे. ही महापौरपदाची थट्टा आहे. राज्यात बाळासाहेबांच्या स्मारकासाठी कुठेही जागा उपलब्ध होऊ शकेल. महापौर निवासासारख्या वास्तूंवर अधिकार सांगत सत्ताधारी चुकीचा पायंडा पाडत आहेत. महापौरांसाठी बंगला असावा, यासाठी बाळासाहेबांनी संघर्ष केला होता. त्या बंगल्यातूनच महापौरांना बाहेर काढले जात आहे, असा टोलाही त्यांनी लगावला.