सोलापूर : बालकांच्या मोफत व सक्तीच्या शिक्षण हक्क कायद्यांतर्गत (आरटीई) शैक्षणिक वर्ष २०२५ - २६ मधील २५ टक्के राखीव जागांवरील प्रवेश प्रक्रियेसाठी बालकांच्या पालकांकडून मंगळवारपासून (ता. १४) अर्ज मागविण्यात येत आहेत. यासाठी २७ जानेवारीपर्यंत मुदत देण्यात आली आहे. पालकांनी सर्व कागदपत्रांसह ऑनलाइन अर्ज करावे, असे आवाहन शालेय शिक्षण विभागाने केले आहे.

शैक्षणिक वर्ष २०२५ - २६ या वर्षासाठी बालकांच्या मोफत व सक्तीच्या शिक्षण हक्क कायद्यांतर्गत दुर्बल व वंचित घटकातील बालकांना स्वयंअर्थसहाय्यित शाळा, विनाअनुदानित शाळा, पोलिस कल्याणकारी शाळा आणि महानगरपालिक (स्वयंअर्थसहाय्यित) शाळांमध्ये २५ टक्के राखीव जागांवर प्रवेशासाठी ऑनलाइन प्रक्रिया राबविण्यात येत आहे. यासाठी जिल्ह्यातील २८९ शाळांनी ऑनलाइन नोंदणी केली आहे. आता या शाळांमध्ये प्रवेशासाठी बालकांच्या पालकांकडून मंगळवारपासून अर्ज मागविण्यात येत आहेत. त्यासाठी २७ जानेवारीपर्यंत सुविधा उपलब्ध करून देण्यात येणार आहे.

‘या’ संकेतस्थळावर करा अर्ज

आरटीईनुसार दुर्बल, आर्थिक व सामाजिकदृष्ट्या मागास घटकातील बालकांना इयत्ता पहिली किंवा पूर्व प्राथमिक वर्ग या स्तरावर प्रवेशासाठी पालकांनी https://student.maharashtra.gov.in/adm_portal या संकेतस्थळावर अर्ज भरण्याची प्रक्रिया विहित मुदतीत पूर्ण करावी.

वंचित घटकांतील बालकांत ‘या’ प्रवर्गाचा समावेश

• अनुसूचित जाती

• अनुसूचित जमाती

• विमुक्त जाती (अ)

• भटक्या जाती (ब, क, ड)

• इतर मागासवर्ग (ओबीसी)

• विशेष मागासवर्ग (एसबीसी)

• आर्थिक व सामाजिकदृष्ट्या मागास घटक

• एचआयव्ही बाधित किंवा एआयव्ही प्रभावित बालके

• अनाथ बालके

• दिव्यांग बालके