कोल्हापूर - किर्लोस्कर ऑईल इंजिन्स लिमिटेडतर्फे 9 ते 12 ऑक्‍टोबर दरम्यान 10 वा किर्लोस्कर वसुंधरा आंतरराष्ट्रीय चित्रपट महोत्सव राजर्षी छत्रपती शाहू स्मारक भवनमध्ये होत आहे. "प्लास्टिकला नकार वसुंधरेला होकार' या संकल्पनेवर आधारित हा महोत्सव आहे, अशी माहिती किर्लोस्कर ऑईल इंजिन्स लिमिटेडचे सीनिअर जनरल मॅनेजर रमेश चव्हाण यांनी आज येथे पत्रकार परिषदेत दिली.

शिवाजी विद्यापीठ, केआयटी, छत्रपती शाहू इन्स्टिट्यूट, न्यू आर्किटेक्‍चर कॉलेज, दळवीज आर्टस्‌ इन्स्टिट्यूट, डी. वाय. पाटील इंजिनिअरिंग कॉलेज नॉलेज पार्टनर म्हणून कार्यरत असतील.  या महोत्सवात पर्यावरण क्षेत्रात काम करणारे मान्यवर, कार्यकर्ते व संस्थांना वसुंधरा सन्मान, वसुंधरा मित्र, वसुंधरा गौरव पुरस्काराने गौरविण्यात येणार आहे,

श्री. चव्हाण म्हणाले, ""देशातील सहा राज्यांत 28 ठिकाणी दहा वर्षे महोत्सव आयोजित केला जात असून, कोल्हापुरातील महोत्सवाचे हे दहावे वर्ष आहे. किर्लोस्कर ऑईल इंजिन्स लिमिटेडमध्ये वेस्टवर प्रक्रिया केली जाते; तसेच इको फ्रेंडली केमिकल, फ्युअलचा वापर केला जातो. प्लास्टिकमुक्त प्रोडक्‍ट बनविणे हे आमचे उद्दिष्ट आहे.'' 

महोत्सवाची ठळक वैशिष्ट्ये 

• हेरिटेज वॉकअंतर्गत 11 ऑक्‍टोबरला कात्यायनी, कळंबा व किर्लोस्कर लिमिटेडची सैर घडविणार. 
• 20 शाळांत रद्दीपासून कापडी पिशव्या तयार करण्यात येत आहेत. 
• पिशव्या 28 सप्टेंबर ते 8 ऑक्‍टोबर दरम्यान नवदुर्गांच्या परिसरात विक्रीसाठी ठेवणार. 
• महोत्सवात एकूण 35 चित्रपट दाखविण्यात येणार.