Ameya Khopkar: प्रसिद्ध पाकिस्तानी गायक आतिफ अस्लम (Atif Aslam) हा लवकरच बॉलिवूडमध्ये कमबॅक करणार आहे, असं म्हटलं जात आहे. रिपोर्टनुसार, आतिफ अस्लम हा LSO90 या बॉलिवूडमधील चित्रपटातील गाणं गाणार आहे. पण आता आतिफच्या बॉलिवूडमधील कमबॅकला मनसेविरोध करत आहे. महाराष्ट्र नवनिर्माण सेनेचे (Maharashtra Navnirman Sena) नेते अमेय खोपकर (Ameya Khopkar) यांनी नुकतेच एक ट्वीट शेअर केलं आहे. त्यांच्या या ट्वीटनं अनेकांचे लक्ष वेधले आहे.

अमेय खोपकर यांचे ट्वीट

अमेय खोपकर यांनी ट्वीटमध्ये लिहिलं, "आतिफ अस्लम या पाकड्या गायकाला बॉलिवूड फिल्ममध्ये गाण्यासाठी इथलेच काही निर्माते पायघड्या घालतायत.विरोध झाला तर फाट्यावर मारण्याची भाषा अरिजीत सिंग करतोय. न्यायालयाने दिलेल्या निर्णयाच्या बळावर फुरफुरणाऱ्यांची मस्ती आता उतरवावीच लागेल. पुन्हा-पुन्हा सांगावं लागतंय हेच दुर्दैव आहे, पण तरीही सांगतोच. पाकिस्तानी कलाकार इथे खपवून घेतले जाणार नाहीत म्हणजे नाहीत, हीच मनसेची भूमिका होती, आहे आणि पुढेही राहणार. फक्त बॉलिवूडच नाही तर कोणत्याही भाषेतील चित्रपटात पाकड्यांकडून गाणं रेकॉर्ड करुन दाखवाच. हे चॅलेंज स्वीकारण्याची हिंमत कुणी करु नये, एवढाच सल्ला आत्ता देतोय."

अमेय खोपकर यांनी याआधी देखील पाकिस्तानी कलाकार आणि पाकिस्तानी चित्रपटांबाबत वक्तव्य केलं आहे. पाकिस्तानी कलाकारांनी बॉलिवूडमध्ये काम करण्यावर मनेसनं विरोध दर्शवला होता. ‘द लेजंड ऑफ मौला जट्ट’ या पाकिस्तानी चित्रपटाच्या भारतातील प्रदर्शनाचा विरोध देखील अमेय खोपकर यांनी केला होता.

आतिफ अस्लमच्या गाण्यांना मिळते प्रेक्षकांची पसंती

आतिफ अस्लमच्या गाणी प्रेक्षक अवडीनं ऐकतात. आतिफनं अनेक बॉलिवूड चित्रपटांमधील गाणी गायली आहे. अजब प्रेम की गजब कहानी या हिंदी चित्रपटातील "तू जाने ना" हे गाणं आतिफनं गायलं आहे. तसेच त्याच्या तेरा होने लगा हूं , दिल दियां गल्लां,तू मोहब्बत है या गाण्यांना प्रेक्षकांची विशेष पसंती मिळाली. आता आतिफ अस्लम बॉलिवूडमध्ये कमबॅक करु शकणार का? याकडे अनेकांचे लक्ष लागले आहे.