मुंबईवर 26/11 रोजी हल्ला झाला होता. त्यावेळच्या त्या कटू आठवणी आजही मनाला वेदना देतात. ती सहजासहजी विसरता न येणारी आठवण आहे. त्या घटनेकडे जेव्हा आपण वस्तुनिष्ठपणे पाहायला लागतो तेव्हा त्यावेळी मोलाची मदत ही फ्रंटलाईन वर्कर्सची झाली होती. त्यांच्या कामगिरीकडे थोडं दुर्लक्ष झालं. त्यांच्या योगदानावर आधारित Mumbai Diaries 26/11 ही मालिका आहे. त्यातून फ्रंटलाईनर्सच्या योगदानाला हायलाईट करण्यात आलं आहे. आपण साकारलेल्या इतर भूमिकांपैकी ही एक वेगळी भूमिका साकारता आली. मात्र तो टास्क आव्हानात्मक होता. असं मत प्रख्यात अभिनेत्री मृण्मयी देशपांडे हिनं व्यक्त केली आहे.

अॅमेझॉन ओरिजनल सीरिज प्रस्तुत आणि निखिल अडवाणी दिग्दर्शित Mumbai Diaries 26/11 या वेबसीरिजचा ट्रेलर नुकताच रिलिज झाला आहे. येत्या ९ सप्टेंबरला ही सीरिज प्रदर्शित होणार आहे. त्यानिमित्तानं या मालिकेतील प्रमुख अभिनेत्री मृण्मयी देशपांडेशी सकाळनं खास संवाद साधला. त्यात तिनं या नव्या सीरिजबद्दलच्या वेगवेगळया गोष्टी आपल्या चाहत्यांसोबत शेयर केल्या आहेत. याशिवाय तिनं सेलिब्रेटींना विनाकारण जे ट्रोल करण्यात येतं, त्यावरुनही तिनं आपलं मत व्यक्त केलं आहे. सेलिब्रेटींना विनाकारण होणारं ट्रोलिंग यासाठी एखादा कायदा असावा का, असा प्रश्न तिला विचारण्यात आला होता. त्यावर तिनं कायद्याची गरज नसून लोकांची मानसिकता बदलण्याची गरज आहे. अशा प्रकारे आपलं मत व्यक्त केलं आहे.

मुंबई डायरीज 26/11 हे काल्पनिक वैद्यकीय नाट्य आहे. त्यात 26/11च्या रात्रीचा भीतीदायक आणि अविस्मरणीय प्रसंग अधोरेखित करण्यात आले आहे. ही मालिका अशा घटनांचा लेखाजोखा मांडते ज्या सरकारी रूग्णालयात घडतात आणि रूग्णालयातील वैद्यकीय कर्मचारी तसेच आणीबाणीच्या प्रसंगाला आणि आव्हानांना उलगडून दाखवते. मुंबई डायरीज 26/11 ही मालिका, डॉक्टर, परिचारिका, पॅरामेडिकल आणि रूग्णालय कर्मचारी ज्यांनी २६ नोव्हेंबर २००८ साली झालेल्या दहशतावादी हल्ल्यादरम्यान लोकांचे जीव वाचवण्यासाठी अथक परिश्रम घेतले. त्यांच्या अप्रकाशित कथा फारशा लोकांपुढे आल्या नाहीत. या शो च्या माध्यमातून त्या आपल्यासमोर आल्या आहेत. या मालिकेमध्ये कोंकणा सेन शर्मा, मोहित रैना, टिना देसाई, श्रेया धन्वंतरी, सत्यजित दुबे, नताशा भारद्वाज, प्रकाश बेलावडी यांच्या भूमिका आहेत.