सोयगाव : शिक्षकांच्या बदली प्रक्रियेतून सोयगाव तालुक्याला १२ नवीन शिक्षक मिळाले असून तेरा शिक्षकांची सोयगाव तालुक्यातून जिल्ह्याबाहेर बदली झाली आहे. त्यामुळे सोयगावात शिक्षकाची पुन्हा स्थिती जैसे थे झाली असून समायोजनमधून दहा अतिरिक्त शिक्षकांची इतर शाळेत बदली केल्ल्याचे गटशिक्षणाधिकारी रंगनाथ आढाव यांनी सांगितले.

सोयगावसह फर्दापूर, ठाणा या तीन उर्दू माध्यमांच्या शाळांना अखेर नवीन पाच शिक्षक मिळाले आहेत. त्यामुळे ऊर्दूच्या विद्यार्थ्यांची पाच वर्षांची प्रतीक्षा संपली आहे.शुक्रवारी सोयगावच्या प्राथमिक ऊर्दू शाळेत दोन शिक्षक रुजूदेखील झाले आहेत. सोयगाव तालुक्यात ऊर्दूच्या तीन प्राथमिक शाळांना पाच शिक्षक मिळाले आहेत. सोयगाव-२, फर्दापूर-१ आणि ठाणा-२ असे ऊर्दूचे, तर गणित व विज्ञान या विषयासाठी एक, भाषा विषयासाठी प्राथमिक शाळांना प्रत्येकी एक असे पाच शिक्षक मिळाले आहे.

भाषा विषयासाठी बोरमाळ तांडा-१, निंबायती-१, नांदा तांडा-१, पळाशी-१,जमाठी-१ व लेनापूर प्राथमिक शाळेला एक असे एकूण १२ शिक्षक सोयगाव तालुक्यात नवीन आले. मात्र तेरा शिक्षकांची सोयगाव तालुक्यातून जिल्ह्याबाहेर बदली झाली आहे. सोयगाव तालुक्यात नवीन बारा शिक्षक मिळाले. मात्र दुसरीकडे जिल्ह्याबाहेर बदलीतून तेरा शिक्षक बदली करून गेले. त्यामुळे सोयगाव तालुक्यात आगामी वर्षातही शिक्षकांची कमतरता भासणार आहे.

जिल्हा परिषदेच्या सह शिक्षकांच्या बदली प्रक्रियेत शनिवारी (दि.१६) होणाऱ्या बदलीतून सोयगावला अजून शिक्षक मिळणार आहेत. त्यामुळे सोयगावला शिक्षक संख्या समाधानकारक राहील.

- रंगनाथ आढाव, गटशिक्षणाधिकारी, सोयगाव.