लातूर - ई-पॉस मशीनऐवजी पूर्वीच्या पद्धतीने धान्य घेणाऱ्या शिधापत्रिकाधारकांना (रेशनकार्डधारक) आता धान्य मिळणार नाही. पुरवठा विभागाच्या प्रणालीत आधार क्रमांकाची नोंद न केलेल्या अशा रेशनकार्डधारकांना व त्यांच्या कुटुंबातील सदस्यांना देण्यात येणाऱ्या धान्यात चालू महिन्यापासून निम्मी कपात करण्याचे आदेश राज्य सरकारने दिले आहेत. निम्म्या धान्याचे वाटपही कार्डधारकांची खात्री करून व गरज पाहूनच वाटप करण्याचे आदेश असल्याने अशा रेशनकार्डधारकांच्या नावावर होणारा स्वस्त धान्याचा बेनामी बाजार थांबणार आहे.

यामुळे जिल्ह्यातील सहा हजार सात रेशनकार्डधारक व कार्डधारकांच्या कुटुंबांतील साडेतीन लाख सदस्यांना धान्य मिळणार नाही. त्यांच्या नावावर दरमहा येत असलेल्या आठ हजार क्विंटल धान्याची कपात होणार आहे. पुरवठा विभागाच्या ई-पीडीएस या प्रणालीत आधार क्रमांकाची नोंद केलेल्या रेशनकार्डधारक व लाभार्थींना ई-पॉस मशीनवरून धान्याचे वाटप करण्यात येत आहे. आधार नोंद नसलेल्यांना पूर्वीच्या पद्धतीने धान्याचे वाटप सुरू होते. ही पद्धत पूर्ण बंद करून ई-पॉस मशीनवरूनच शंभर टक्के धान्याचे वाटप करण्यासाठी सरकारने पावले उचलली आहे. सरकारच्या आदेशानुसार पूर्वीच्या पद्धतीनुसार वाटप होणाऱ्या धान्यात निम्मी कपात करून चालू महिन्यात रेशन दुकानदारांना धान्य वितरित केले जात असल्याचे सहायक जिल्हा पुरवठा अधिकारी स्वप्नील पवार यांनी सांगितले.

आधार नोंदणीची स्थिती 
 एकूण रेशन कार्डधारक     ः     ३,६४,५८०
 लाभार्थी संख्या     ः     १९,३०,९३१
 आधार नोंदणी झालेले कार्डधारक     ः     ३,५८,५७३
 आधार नोंदणी न झालेले कार्डधारक     ः     ६००७
 आधार नोंदणी झालेले लाभार्थी     ः     १५,८३,१७६
 आधार नोंदणी न झालेले लाभार्थी     ः     ३,४७,७५५
 आधार नोंदणीकृत कार्डधारकाचे प्रमाण ः     ९८.३५ टक्के
 आधार नोंदणीकृत लाभार्थींचे प्रमाण     ः     ८१.९९ टक्के