औरंगाबाद - सातारा परिसरात नातेवाइकांच्या कार्यक्रमासाठी दुचाकीवर निघालेल्या कुटुंबाला भरधाव ट्रकने धडक दिल्याची घटना गुरुवारी (ता. १४) दुपारी चारच्या सुमारास रेल्वेस्टेशन उड्डाणपुलाजवळ घडली. या अपघातात मागे बसलेल्या महिलेचा चिरडल्याने मृत्यू झाला; तर दुचाकीवरील एक युवक व बारा वर्षांची मुलगी जखमी झाली. या प्रकरणी सातारा पोलिसांनी ट्रकचालकाविरुद्ध गुन्हा नोंदवून त्यास अटक केली आहे. राधा अशोक साबरवाल (४०, रा. पदमपुरा) असे मृताचे नाव आहे. 

राधा या गुरुवारी दुपारी चारच्या सुमारास दुचाकीने (एमएच- २०, डीएम- ५३०) एक युवक आणि एका बारावर्षीय मुलीसह सातारा परिसरात जात होत्या. त्यांची दुचाकी रेल्वेस्टेशन उड्डाणपुलावरून उतरत असताना अजिंठा वाशिंग सेंटरसमोर पाठीमागून भरधाव येणाऱ्या फरशीने भरलेल्या ट्रकने (जीजे- ३६, टी- ५२५५) त्यांना धडक दिली. यात युवक आणि मुलगी जखमी झाली; तर राधा या ठार झाल्या. परिसरातील नागरिकांनी तातडीने घटनास्थळी धाव घेऊन गंभीर जखमींना घाटी रुग्णालयात दाखल केले. सातारा पोलिसांनी घटनास्थळी धाव घेत ट्रक जप्त करून चालक सिंकदर आदमभाई यास ताब्यात घेतले.