औरंगाबाद : जिल्ह्यात शनिवारी सलग दुसऱ्या दिवशी अनेक ठिकाणी पावसाने हजेरी लावली. विजांच्या कडकडाटासह काही ठिकाणी दमदार बरसलेल्या पावसाने शेतकऱ्यांच्या आशा पल्लवित केल्या आहेत. खरीप हंगामाच्या अनुषंगाने शेती मशागतीची कामे अंतिम टप्प्यात आहेत. सिंचनाची सोय उपलब्ध असलेल्या भागात याआधीच ठिबकवर कपाशी, मिरची, आद्रक लागवडीला शेतकऱ्यांनी प्राधान्य दिले आहे. दोन दिवसापासून सतत हजेरी लावणारा पाऊस लागवड झालेल्या पिकांसाठी आशादायक आहे.

शुक्रवारी औरंगाबाद तालुक्यात सरासरी १५.२ मिलिमीटर गंगापूर तालुक्यात सरासरी १४.१ मिलिमीटर, वैजापूर तालुक्यात सरासरी १२.६ मिलिमीटर, कन्नड तालुक्यात २४.२ मिलिमीटर, सिल्लोड ८.९ मिलिमीटर तर सोयगाव तालुक्यात १ मिलिमीटर व फुलंब्री तालुक्यात सरासरी १ मिलीमीटर पावसाची नोंद झाली होती. आता सलग दुसऱ्या दिवशी शनिवारीही पाऊस झाला.