औरंगाबाद : सव्वीस आठवड्याच्या गर्भात व्यंग असल्यामुळे संबंधित महिलेस औरंगाबाद खंडपीठाने गर्भपात करण्याची परवानगी दिली. गर्भातील बाळाचा पूर्ण विकास होऊ शकणार नसल्याचा अहवाल डॉक्टरांनी दिला होता.

शहरातील एका महिलेस गर्भधारणा झाली होती. या महिलेने ११ जून रोजी तपासणी केली असता गर्भातील बाळ जन्मास आल्यानंतर त्यास अपंगत्व येऊन त्याचा विकास पूर्ण होऊ शकणार नाही, असा अहवाल डॉक्टरांनी दिला होता. त्यामुळे संबंधित महिलेने अॅड. संदीप राजेभोसले यांच्यामार्फत मुंबई उच्च न्यायालयाच्या औरंगाबाद खंडपीठात याचिका दाखल करुन गर्भपात करण्यासाठी परवानगी मिळण्याची विनंती केली. या याचिकेवर शुक्रवारी सुनावणी होऊन शासकीय वैद्यकीय महाविद्यालय व रुग्णालय येथील डॉक्टरांचा अहवाल मागविण्यात आला होता. हा अहवाल व अॅड. दिनेश चव्हाण यांचा युक्तिवाद ग्राह्य धरुन औरंगाबाद खंडपीठाचे न्या. आर. व्ही. घुगे व न्या. ए. एल. पानसरे यांनी महिलेस गर्भपात करण्यास कायदेशीर परवानगी दिली.