औरंगाबाद : महापालिकेच्या जागेवरील अतिक्रमण हटविल्यानंतर त्या जागेला तारेचे कुंपण करण्यास विरोध करीत एका महिलेने अंगावर रॉकेल ओतून घेत पेटवून घेण्याचा प्रयत्न केला. ही घटना मयूरबन वॉर्डातील राजनगरात मंगळवारी (ता. 28) सायंकाळी घडली. पोलिसांनी हस्तक्षेप करीत महिलेला ताब्यात घेतल्याने पुढील अनर्थ टळला. पण यावेळी तिने सहायक पोलिस निरीक्षकांना चावा घेतल्याचेही प्रत्यक्षदर्शींनी सांगितले.

मयूरबन कॉलनीत राजनगर सोसायटीच्या सुमारे आठ हजार चौरस फूट जागेवर अतिक्रमण झाले होते. सोसायटीची ही खुली जागा महापालिकेकडे हस्तांतरित करण्यात आली होती; मात्र महापालिकेच्या शाळेलगतच हे अतिक्रमण करण्यात आले. या भागातील नागरिकांनी अतिक्रमण हटविण्याची मागणी महापालिकेकडे केली होती.

वारंवार पाठपुरावा केल्यानंतर अधिकारी कारवाई करीत नसल्याने त्यांनी आयुक्तांकडे तक्रार केली. त्यानंतर मात्र महापालिकेच्या अतिक्रमण हटाव पथकाने 21 जानेवारीला हे अतिक्रमण हटविले. यावेळी साहित्य घेण्यासाठी कोणी समोर आले नव्हते. साहित्य तसेच पडून असल्याने परिसरातील नागरिकांनी सोमवारी (ता. 27) पुन्हा आयुक्तांची भेट घेतली.

आंतरराष्ट्रीय गाजलेले चित्रपट पाहायचेत? चला औरंगाबादला! 

आयुक्तांनी खुल्या जागेला तार फेन्सिंग करण्याचे आदेश दिले. उपायुक्त रवींद्र निकम यांच्या मार्गदर्शनाखाली महापालिकेचे पथक मंगळवारी पोलिसांना सोबत घेऊन दुपारी या ठिकाणी पोचले. यावेळी काही जण तिथे आले व विरोध केला. ही जागा आपल्या मालकीची असल्याचे सांगत तार फेन्सिंग करण्यास विरोध केला. 

पोलिस, महापालिका अधिकाऱ्यांना शिविगाळ 

पथकाने जमावाच्या विरोधाला न जुमानता काम सुरू केले. त्यामुळे जमावातील काहींनी पथकातील अधिकारी व पोलिसांना अवार्च्य भाषेत शिवीगाळ केली. त्याचवेळी गंगूबाई काळे या महिलेने अंगावर रॉकेल ओतून घेतले व स्वत:ला पेटवून घेण्याचा प्रयत्न केला; मात्र हा प्रकार लक्षात येताच पोलिसांनी धाव घेत या महिलेला आणि इतर दोघांना ताब्यात घेतले.

 एका क्‍लिकवर वाचा औरंगाबादची गुन्हेगारी     

यावेळी तिने सहायक पोलिस निरीक्षक श्रद्धा वायदंडे यांना चावा घेतल्याचेही प्रत्यक्षदर्शींनी सांगितले. या प्रकारानंतर महापालिकेच्या पथकाने तार फेन्सिंगचे काम पूर्ण करून हा भूखंड ताब्यात घेतला.