छत्रपती संभाजीनगर : शहरात येणाऱ्या पर्यटकांना बिबी-का-मकबरा, पाणचक्की, सोनेरी महल, छत्रपती शिवाजी महाराज पुराणवस्तू संग्रहालयासह इतर पर्यटनस्थळे पाहण्याची सोय व्हावी, म्हणून महापालिकेने डबल डेकर शहर पर्यटन बस सुरू करण्याची घोषणा केली खरी; मात्र तीन वर्षांनंतरही ही बस रस्त्यावर उतरलेली नाही. त्यामुळे स्वतःचे वाहन असेल तरच किंवा रिक्षांना पैसे मोजूनच पर्यटनस्थळावर जावे लागत आहे.

जगप्रसिद्ध वेरूळ-अजिंठा लेणी पाहण्यासाठी दरवर्षी हजारो पर्यटक शहरात येतात. यातील बहुसंख्य पर्यटक छत्रपती संभाजीनगर शहरात मुक्कामी राहत नाहीत, अनेकजण वन डे टूरचे नियोजन करतात. अशा पर्यटकांनी शहरात मुक्कामी थांबावे, त्यांच्यासाठी बीबी-का-मकबरा, पाणचक्की, सोनेरी महल, छत्रपती शिवाजी महाराज पुराणवस्तू संग्रहालय, महापालिकेचे प्राणिसंग्रहालय, शहरातील ऐतिहासिक नहर-ए-अंबरी अशा महत्त्वाच्या पर्यटनस्थळांना भेटी द्याव्यात, त्यातून शहरात रोजगार निर्मितीला चालना मिळावी, यासाठी वारंवार चर्चा होत आहे.

शहरातील पर्यटनाला चालना देण्यासाठी महापालिकेतर्फे वारंवार घोषणा केल्या जातात, मात्र, प्रशासनाकडून त्यावर कृती होत नसल्याचे चित्र आहे. तत्कालीन पर्यटनमंत्री आदित्य ठाकरे यांच्या सूचनेवरून तत्कालीन प्रशासक आस्तिककुमार पांडेय यांनी डबल डेकर शहर बस सुरू करण्याचा निर्णय घेतला होता.

मुंबईत बेस्टकडे अशा डबल डेकर बस असल्याने त्या धर्तीवर इलेक्ट्रिक डबल डेकर बस महापालिकेने खरेदी कराव्यात, अशी सूचना श्री. ठाकरे यांनी केली होती. त्यानुसार महापालिका अधिकाऱ्यांचे पथक मुंबईला जाऊन आले. बस खरेदीची प्रक्रिया सुरू केली जाईल, असे जाहीर झाले पण त्यानंतर आलेल्या कोरोना संसर्गाच्या लाटेत डबल डेकर बस रस्त्यावर आलीच नाही. त्यामुळे पर्यटकांना शहरातील पर्यटनस्थळांपर्यंत पोचण्यासाठी स्वतःच्या वाहनांचा किंवा रिक्षांचा वापर करावा लागत आहे.

पर्यटकांची लुबाडणूक

अनेक पर्यटकांना पर्यटनस्थळांची माहितीही नसते. अशावेळी अनेक रिक्षाचालक अवाच्या सव्वा भाडे आकारून पर्यटकांची आर्थिक लुबाडणूक करतात. तसेच पर्यटनस्थळांच्या ठिकाणी पार्किंगवरून नेहमीच वादावादी होते तर काही ठिकणी पार्किंगसाठी जागाही नाहीत. त्यामुळे पर्यटक शहरातील पर्यटनस्थळांकडे पाठ फिरवतात.

पर्यटन अधिकारी म्हणून मिळाले कोण...तर विद्यार्थी!

राज्याची पर्यटन राजधानी असलेल्या छत्रपती संभाजीनगर महापालिकेत पर्यटन विभाग दुर्लक्षितच आहे. महापालिकेने स्वतंत्र अधिकाऱ्याची नियुक्ती देखील केली नव्हती. अखेर जी. श्रीकांत यांनी टुरिझम प्रमोशन अधिकारी म्हणून एका विद्यार्थ्याची नियुक्ती केली आहे. शहरातील पर्यटनाला चालना देण्यासाठी नियोजन करण्याची जबाबदारी या विद्यार्थ्यावर सोपविण्यात आली आहे.