छत्रपती संभाजीनगर : पंतप्रधान पोषण शक्ती निर्माण योजनेमध्ये नावीन्यपूर्ण उपक्रमांतर्गत विद्यार्थ्यांच्या शालेय पोषण आहारात अंडी, केळीचा समावेश करण्याचा निर्णय घेण्यात आला. एका अंड्यासाठी शासनाकडून पाच रुपये देण्यात येणार होते. बाजारात एक अंडे सहा रुपयांपेक्षा अधिक किमतीने मिळत आहे. त्यामुळे विद्यार्थ्यांना अंडे पुरवायचे कसे, असा सवाल ‘सकाळ’ने उपस्थित केला होते. या वृत्ताची दखल घेत शासनाने बाजार भावानुसार शाळांसाठी अंड्यांचा जो दर निश्चित होईल तो देण्यासंदर्भात परिपत्रक जारी केले आहे.

शाळेतील विद्यार्थ्यांच्या शालेय पोषण आहारात दर बुधवारी किंवा शुक्रवारी अंडी व केळी तथा इतर स्थानिक आहार समावेश करावा, यासाठी प्रतिविद्यार्थी पाच रुपये खर्च करावा, असे शासनाचे आदेश आहेत. मात्र, सध्या बाजारात एका अंड्याची किंमत सहा रुपयांहून अधिक असल्याने खर्चाचा ताळमेळ बसवायचा कसा, असा महत्त्वपूर्ण मुद्दा शिक्षक संघटनांनी उपस्थित केला. याबाबत ‘सकाळ’ने ‘शालेय पोषण आहार खर्चाचा शाळांनी ताळमेळ बसवायचा कसा?’ या मथळ्याखाली वृत्त प्रसिद्ध केले होते.

या वृत्ताची दखल घेत शासनाने एनईसीसीच्या (National eggs co-ordination committee) च्या त्या-त्या महिन्यात ठरणाऱ्या बाजार भावानुसार शाळांसाठी अंड्यांचा जो दर निश्चित होईल तो देण्याचे परिपत्रकानुसार घोषित केले आहे. या निर्णयाचे शिक्षक भारतीचे राज्यनेते प्रकाश दाणे, सुनील चिपाटे, महेंद्र बारवाल, राजेश भुसारी, संतोष ताठे, संजय बुचडे, सुषमा खरे, रोहिणी विद्यासागर शिक्षक समितीचे जिल्हाध्यक्ष विजय साळकर, नितीन नवले, श्याम राजपूत, सतीश कोळी आदींनी स्वागत केले आहे.