औसा (जि.लातूर) : आपला वाढदिवस जंगी आणि जिवलग मित्र-मैत्रिणी व परिवारातील लोकांमध्ये साजरा करण्यात यावा अशी प्रत्येकाची इच्छा असते. मग या वाढदिवसाला ज्याच्या त्याच्या ऐपतीप्रमाणे खर्च होतो. मात्र वाढदिवस साजरा न करता जो खर्च येणार आहे तो चांगल्या कामासाठी उपयोगात आणणारे दुर्मिळच. या सर्व प्रकाराला फाटा देत सामाजिक भान आणि जबाबदारी ओळखून औसा शहरातील एका वीसवर्षीय तरुणीने कोरोना विरोधात सुरू असलेल्या लढाईत वीस हजार रुपयांचा धनादेश मुख्यमंत्री सहायता निधीला देऊन एक वेगळा आदर्श निर्माण केला आहे.

येथील कृषी उत्पन्न बाजार समितीत अडत दुकान असलेले अडत संघटनेचे अध्यक्ष मदनलाल झंवर यांची कन्या कीर्ती झंवर हिचा शुक्रवारी (ता.२२) विसावा वाढदिवस होता. वडील मदनलाल झंवर यांना पहिल्यापासूनच सामाजिक कार्याची आवड आहे. कोरोनाच्या लढाईत शासन करीत असलेले काम आणि त्यासाठी कमी पडणारा निधी याची त्यांना पूर्ण कल्पना होती. घरात मुलीचा धूमधडाक्यात वाढदिवस साजरा करून क्षणिक आनंद घेण्यापेक्षा हा खर्च न करता मुख्यमंत्री सहायता निधीत हा पैसा जमा करण्याची कल्पना त्यांनी आपली मुलगी कीर्तीला सांगितली. तिलाही ही कल्पना पटली. शुक्रवारी सकाळी सेनेचे जिल्हाप्रमुख संतोष सोमवंशी यांच्याकडे विसाव्या वाढदिवसानिमित्त वीस हजार रुपयांचा धनादेश मुख्यमंत्री सहायता निधीसाठी देण्यात आला.

औसा, चाकूर, जळकोटमध्ये तापमानात वाढ, नागरिक उष्णतेने हैराण

माझ्या वाढदिवसाचा हा खर्च राज्याच्या संकटात कामाला यावा हे माझं भाग्य आहे. सामाजिक भान ठेवून काम करा ही वडिलांची शिकवण असल्याने कोरोनाच्या या लढाईत माझा खारीचा वाटा मी उचलत असल्याचे खूप मोठे समाधान आहे.
- कीर्ती झंवर